Spanja do të luajë me një diabetik në vend të Zhordi Alba

Të zëvendësosh një lojtar si Zhordi Alba nuk është e lehtë dhe këtë e di më mirë se të gjithë Naço Fernandez, mbrojtësi i Real Madrid, i cili do të ketë detyrën të zbresë në krahun e majtë të prapavijës spanjolle për takimin e sotëm. Futbollisti ka zbritur shumë rrallë në fushën e lojës me përfaqësuesen, edhe pse ka qenë vazhdimisht i grumbulluar, për faktin e thjeshtë se Alba është një titullar fiks ndërsa Azpilikueta ishte zgjedhje e dytë për Del Bosken.

Gjërat kanë ndryshuar me Lopeteguin, i cili e njeh mirë që nga koha kur e ka drejtuar te Kastija, ekipi i dytë i Realit. Trajneri ka besim të plotë te futbollisti në fjalë, edhe pse nuk luan rregullisht me madrilenët e Zidan. Ai nuk ngurroi ta aktivizonte në momentin që Alba u dëmtua ndaj Italisë dhe një gjë të tillë do ta bëjë edhe sot ndaj Shqipërisë, në atë që do të jetë ndeshja e tij e 6 me kombëtaren.

Por pakkush e di se Naço detyrohet të stërvitet çdo ditë, edhe kur nuk ka pushim, apo duhet t’i nënshtrohet një regjimi mjaft të veçantë ushqimor. Arsyeja është e shumë e thjeshtë, ai vuan nga diabeti. Megjithatë, kjo nuk e ka penguar që të shfaqet në nivelet më të larta gjatë karrierës së tij në të cilën regjistron mes të tjerash edhe dy Liga Kampionesh të fituara.