Tahiri dyshon te kërcënimet e Llallës: Do isha njoftuar, po të ndodhnin

Ministri i Brendshëm, Saimir Tahiri ka vënë në dyshim në një farë mënyre kërcënimin e kryeprokurorit Llalla.

I ftuar në “Top-Story”, Tahiri u pyet për kërcënimet e Llallës dhe tha se po të kishte ndodhur një gjë e tillë duhet të ishte njoftuar.

PYTJE-PERGJIGJE

Si e pritet lajmin që Prokurori i Përgjithshëm, familjarët e prokurorit janë kërcënuar deri në pikën që të largohen nga Shqipëria?

Unë nuk kam informacion për këtë. Unë e kam marrë vesh nga media. Kam komunikuar me Prokurorin e Përgjithshëm informacionin që kam dhe që besoj është ajo që kam dëgjuar prej tij. Më shumë nuk mund të flas sepse nuk është një çështje për të cilën duhet të përgjigjem unë në vetë të parë. Preferoj të besoj atë që kam komunikuar me Prokurorin dhe në këtë rast nëse do të kishte gjë tjetër, besoj do ta dija për shkak të funksionit.

Ka hetuar policia për këtë çështje?

Jo nuk ka hetuar.

Pra ju nuk jeni informuar paraprakisht nga kryeprokurori për problemin?

Jo. Unë e kam marrë vesh nga lajmet.

: Ju duket normale që kryeprokurori të mos njoftojë ministrin e Brendshëm në një rast të tillë? Nuk ka besim tek ministri i Brendshëm?

Nëse do të ishte kërcënuar nuk do të më dukej normale.

Përse e lini në kushtore? Ju nuk besoni që ai mund të jetë kërcënuar?

Nuk jam unë për t’u pyetur për këtë çështje.

Pra ju nuk besoni që kryeprokurori është kërcënuar?

Unë thashë që nëse do të ishte kërcënuar nuk do të më dukej normale të mos e dija zyrtarisht.