Të dhënat e SHISH zbuluan drogën rekord. Ja dyshimet

Të dhënat e SHISH zbuluan sasinë rekord të drogës në Vlorë, por një oficer policie i përfshirë në trafikun e drogës nuk u arrestua. Operacioni nisi dy javë më parë me urdhër të Prokurorisë së Krimeve të Rënda, por mundi të finalizohej vetëm dje, pasi drejtuesit vendorë insistonin se zona ku u gjet droga ishte kontrolluar më parë.

Një operacion i nisur dy javë më parë përfundoi dje me arrestimin e gjashtë personave dhe shpalljen në kërkim të një oficeri policie, i dyshuar për lodhjen me drogën.

Policia tha zyrtarisht se u shkatërruan 7 parcela të mbjella me kanabis në zonën e Treblovës dhe Vezhdanishtit në Vlorë.

Por dyshohet se sasia e drogës i tejkalon parcelat me 7 mijë rrënjë, pasi ka dyshime të forta se një sasi prej 7 tonësh është gjetur e presuar gati për shitje.

Për këtë pjesë të operacionit nuk flet askush, as policia dhe Ministri i Brendshëm që akuzon mediat si pjesë e frontit të së keqes dhe as Prokuroria e cila ka drejtuar këtë operacion.

Burime të policisë dhe prokurorisë konfirmojnë se të dhënat për sasinë rekord të drogës janë dhënë fillimisht nga Shërbimi Informativ Shtetëror, i cili ka dërguar në Prokurorinë e Krimeve të Rënda detaje mbi parcelat e mbjella, personat e përfshirë dhe disa tentative për shitjen e kanabisit që ishte i paketuar.

Nisur nga këto të dhëna prokuroria ka vënë në përgjim disa prej të dyshuarve, duke arritur të identifikojë të paktën 6 prej tyre, si dhe një oficer policie të përfshirë në kultivimin dhe shitjen e narkotikëve.

Por edhe pse të dhënat ishin të sakta, të konfirmuara me përgjime telefonike, sërish policia vendore ka insistuar se kjo zonë ishte kontrolluar më parë dhe kishte rezultuar e pastër.

Provat për kultivimin dhe shitjen e narkotikëve janë siguruar prej dy javësh, por sërish ka qenë e vështirë që të ndërhyhej edhe për shkak të terrenit, apo gjetjes së gjithë personave të përfshirë në këtë veprimtari kriminale.

Me ndërhyrjen e FNSH-së më në fund është zhvilluar operacioni dhe rezultatet kanë qenë befasuese, edhe pse as policia dhe as prokuroria nuk kanë bërë publike gjithçka ka ndodhur në një prej operacioneve më të rëndësishme antidrogë në vend.

Mapo ka siguruar të dhëna që tregojnë se trafikantët jo vetëm që prisnin të vilnin sipërfaqet me 7 mijë rrënjë, por një pjesë të mirë të kësaj sasie e kishin gati për shitje.

Ata komunikonin me telefona “Blackberry” mes tyre dhe nga të dhënat e siguruara rezulton se në disa raste kanë negociuar për shitje kanabis në sasi të konsiderueshme.

Në një rast, tashmë i provuar për prokurorinë, një nga personat e arrestuar ka patur komunikime të vazhdueshme me një shtetas të identifikuar si A. (nuk jepet emri i plotë për shkak të hetimit), me të cilin kanë rënë dakord për blerjen e një sasie prej 400 kilogram kanabis.

Kjo sasi do të shitej për 60 mijë euro dhe blerësi binte dakord që të ishte e ndarë në dy pjesë me nga 200 kg secila.

Ai i thotë “pronarit” të drogës së 50 mijë euro i kishte në dorë dhe do ja jepte ato ditë në qytetin e Vlorës, ndërsa 10 mijë euro do ja jepte për 10 ose 10 ditë.

Ndërsa shitësi thoshte se disave që ai njihet ju ishte mykur lënda narkotike, ndërsa 200 i kishte gati që atë ditë.

Nuk dihet ende nëse ky transaksion është kryer, por të dhënat e përgjimeve të prokurorisë tregojnë se në këtë aktivitet kriminal janë përfshirë njerëz të rëndësishëm në qytetin e Vlorës, por edhe zyrtarë të lartë të Policisë së Shtetit.

Nuk dihet ende qëndrimi i Prokurorisë së Krimeve të Rënda për këtë çështje, por deri tani është lëshuar urdhër-arresti vetëm për një oficer policie në Drejtorinë e Vlorës, i cili nuk është mundur të kapet nga kolegët e tij dhe është shpallur në kërkim.

Hetimet vijojnë për identifikimin e gjithë personave të përfshirë në këtë veprimtari, pasi dyshimet janë se kjo sasi rekord droge iu përket njerëzve të rëndësishëm në qytetin e Vlorës.