Tentuan të grabisin menaxherin e lokalit, plagoset një prej autorëve

Tre persona janë arrestuar pasi në bashkëpunim me njëri-tjetrin kanë tentuar të vjedhin me armë zjarri menaxherin e një lokali në Radhimë të Vlorës. Por sipas policisë një prej autorëve gjatë përleshjes ka mbetur i plagosur në këmbë.

Policia thotë se u arrestuan në flagrancë shtetasit:
Besjan Hibraj, 24 vjeç, banues në Vlorë.
Klajdi Spahaj, 26 vjeç, banues në Vlorë.
Domeniko Spahaj, 21 vjeç, banues në Vlorë.

Blutë e qytetit bregdetar informojnë: Më datë 23.10.2016, rreth orës 19:00, këta shtetas në bashkëpunim me njëri-tjetrin si dhe me persona të tjerë (ende të paidentifikuar) kanë tentuar të vjedhin me armë zjarri menaxherin e lokalit “Olympia” Radhimë, shtetasin me iniciale A.B., 26 vjeç, banues në Radhimë.

Gjithashtu, në përleshje me njëri-tjetrin gjatë tentativës së vjedhjes, ka mbetur i plagosur në këmbë një prej autorëve, shtetasi Klajdi Spahaj, i cili ndodhet në kushtet e arrestit në Spitalin Rajonal të Vlorës, në gjendje shëndetësore jasht rrezikut për jetën.
Po punohet për dokumentimin e plotë të ngjarjes, identifikimin e autorëve të tjerë dhe kapjen e tyre.