Tërmet 5.3 ballë/ Alarmohet Jugu, qytetarët braktisin banesat

Të gjendur në panik nga tërmetet e shumta që kanë rënë gjatë orëve të mbrëmjes së të shtunës dhe deri në të gdhirë të së dielës, banorët e Gjirokastrës, kanë preferuar ta kalojnë natën jashtë duke mos vënë gjumë në sy.

Prej orës 23:00 të ditës së shtunë e deri në orën 06:00 të së dielës, kanë rënë afërsisht 7 tërmete të cilat janë ndjerë mjaft nga banorët e pallateve në pjesën e poshtme të Gjirokastrës. Për të qenë të sigurtë, ata kanë dalë jashtë banesave dhe apartamenteve në pritje për tërmetin e radhës. Ka pasur edhe nga ata që familjarisht kanë preferuar xhirot në rrugët e qytetit apo dhe kafe në lokalet që kanë qenë hapur dhe nuk janë mbyllur përgjatë mbrëmjes dhe orëve të para të së dielës.

Paniku ka qenë i madh pasi për herë të parë, ndodh kjo situatë në Gjirokastër të paktën gjatë 7 dekadave të fundit. Të mocmit, nuk mbajnë mend që valë sizmike kaq të afërta me njëra-tjetrën dhe me intensitet mjaft të madh, të kenë goditur Gjirokastrën. Ajo që po ndodh, është e pashpjegueshme në fakt./jugunews