Thaçi: Vetëm bashkarisht mund ta luftojmë trafikun e qenieve njerëzore

Presidenti i Republikës së Kosovës, Hashim Thaçi, në konferencën e organizuar për Ditën e Bashkimit Evropian Kundër Trafikimit me Qenie Njerëzore ka shprehur se për të pasur sukses në parandalimin dhe luftimin e trafikimit me njerëz, nevojitet një bashkëpunim i të gjithë mekanizmave dhe autoriteteve në nivelin shtetëror. Sipas tij, është përgjegjësi e çdo institucioni dhe çdo personi në Kosovë, që të angazhohet për t’i dhënë fund trafikimit me njerëz në të gjitha format e tij.  ,shkruan Gazeta Express.

“Sukses të plotë në luftën ndaj trafikimit me njerëz nuk mund të kemi pa mbështetjen dhe përfshirjen e të gjithë shoqërisë”, ka thënë presidenti Thaçi.

Ai ka theksuar se shumë njerëz anembanë botës janë duke u përballur me këtë fenomen të turpshëm dhe as Kosova nuk është e përjashtuar prej tij. Sipas tij ky fenomen duhet të parandalohet përmes veprimeve dhe masave konkrete.

Më tej në fjalën e tij Thaçi ka nënvizuar se është momenti i duhur që të gjithë të bashkohemi, që të parandalojmë dhe luftojmë këtë krim, në të gjitha format e tij dhe njëkohësisht të bëjmë më shumë për mbrojtjen e viktimave të trafikuara.

“Republika e Kosovës nuk mund dhe nuk do të qëndrojë e heshtur në luftimin e trafikimit me njerëz. Trafikimi me njerëz është një çështje që na prek të gjithëve dhe në të njëjtën kohë rrezikon të ardhmen e të gjithëve”, ka shtuar ai.

Presidenti Thaçi më tej ka potencuar se autoritetet kompetente për parandalimin dhe luftimin e trafikimit më njerëz, si dhe ofrimin e ndihmës dhe mbrojtjes së viktimave të trafikuara, duhet të veprojnë për ta parandaluar trafikimin, duke denoncuar dhe burgosur trafikantët e sidomos për të ndihmuar e mbrojtur viktimat.