Trafikantët e kanabisit i zënë rrugën prokurorit, ja si u zbuluan 10600 rrënjë drogë

Rojet e parcelave me kanabis pengojnë me armë këdo që tenton t’u afrohet këtyre zonave. Kështu ka ndodhur dje në fshatin Myze të Matit, ku u zbuluan e u asgjesuan 10600 rrënjë kanabis. Prokurori i Matit, Abaz Muça, është përballur me një situatë të pazakontë në punën e tij, teksa ishte nisur drejt vendit të ngjarjes.

I shoqëruar edhe nga një oficer i Policisë Gjyqësore, ai është nisur nga zyra e tij për në vendin ku kishte marrë informacion për parcela të mbjella me lënë narkotike. Duke qënë se informacioni i dhënë nga strukturat e sigurisë ishte operativ dhe bënte fjalë për dyshime mbi implikimin e policëve të caktuar, prokurori i Matit ka vendosur të verifikonte të vërtetën me qëllim që më pas të kryente veprimet e nevojshme hetimore.

Ai është nisur ditën e djeshme i shoqëruar nga një hetues për në zonën e fshatit Myzë, njësia administrative Lis në Mat. Gjatë rrugës për në vendin ku dyshohej se kultivohej drogë, në një zonë pranë fshatit, një Fuoristradë “Toyota”, i ka prerë rrugën makinës ku ndodhej prokurori me gjithë hetuesin e çështjes. Prej saj ka dalë një person i armatosur me kallashnikov, i cili I ka bllokuar rrugën. Pas një debate prej rreth 15 minutash, personi me armë nuk jepte shpjegime pse pengonte lëvizjen në rrugë. Për këtë arsye, prokurori me oficerin janë kthyer mbrapsht dhe kanë njoftuar policinë. Forcat e rendit të shoqëruara edhe nga FNSH në prani të prokurorit kanë shkuar në zonën ku kultuvohej kanabisi dhe kanë gjetur pparcelat e mbjella me 10600 rrënjë. /Panorama