Trump kërcënon të mos njohë zgjedhjet dhe fyen Clinton: Grua e ndyrë. Ja kush e fitoi debatin e tretë

Nga Ruben Avxhiu

Hillary Clinton fiton edhe debatin e tretë, rruga drejt Shtëpisë së Bardhë më e hapur se kurrë

Donald Trump duket se mund t’i vërë shqelmin një prej traditave më të bukura të demokracisë amerikane, atë të pranimit të rezultatit të zgjedhjeve nga humbësi.

“Do t’ju mbaj me frymën pezull”, u përgjigj ai, gjatë debatit të tretë dhe të fundit, me rivalen e tij, Hillary Clinton, pasi shpjegoi se është tepër herët për të që të tregojë nëse do të pranojë humbjen ose jo.

Kjo përgjigje e pavendosur vjen pasi ai dhe fushata e është akuzuar në ditët e fundit se po përbaltin imazhin e demokracisë amerikane, duke folur për manipulim të zgjedhjeve. Disa komentues mendojnë se Trump ka filluar ta humbasë besimin se do të fitojë dhe është duke përgatitur terrenin për të justifikuar dështimin.

Në fakt, debati i djeshëm ishte një nga shanset e fundit të kandidatit republikan për të përmbysur epërsinë e ish-Sekretares së Shtetit në anketimet e opinionit të votuesve. 24 orë përpara debatit, Fox Neës, një rrjet televiziv që është më pozitiv ndaj republikanëve nxori rezultatet që tregonin se Hillary Clinton mund të votohej nga 45% e votuesve të mundshëm, ndërsa Donald Trump nga vetëm 38%.

Mirëpo, mbrëmja e djeshme riprodhoi të njëjtën situatë. Clinton ishte e përqendruar dhe shumë e përgatitur, Trump ishte emocional dhe i shpërndarë. Ai pati momente të mira, sidomos në pjesën kur foli për problemin e emigracionit, ku në një farë mënyrë nënkuptoi se Hillary Clinton e Barack Obama kishin bërë praktikisht pa pranuar, po të njëjtat gjëra që po premtonte ai. Clinton, si senatore, kishte votuar në favor të një lloj gardhi që do të mbyllte kufirin jugor, ndërsa administrata Obama ka deportuar miliona emigrantë pa dokumente në vitet e fundit.
Clinton u vu në situatë dy ose tri herë edhe nga moderuesi Chris Wallace që e konfrontoi për deklarata publike dhe jo publike të bërë në të kaluarën.

Mirëpo, përve këtyre rasteve, kandidatja demokrate mbizotëroi në debatin 90-minutësh, duke treguar vetëpërbajtje, qartësi dhe shënjestër të shkëlqyer në sulmet e saj ndaj Donald Trump. Nuk ishte një betejë e barabartë. CNN, i vetmi rrjet televiziv, që bashkë me ORC anketojnë drejtpërdrejt teleshikuesit, tha, në fund të debatit, se Hillary Clinton fitoi 52%-39% sipas tyre.

Trump e fyen: “Grua e ndyrë”, Hillary e bën të flasë me vete

Kandidati republikan ishte thjesht i paaftë të artikulonte si duhet pikëpamjet e tij, në debatin e fundit. Duke humbur disa herë toruan, ai e ndërpreu rivalen e tij 37 herë, gjatë 90 minutave dhe në disa raste duke e fyer atë.

Hillary Clinton tregoi një vetëpërmbajtje të jashtëzakonshme dhe shpesh u hoq sikur nuk e dëgjoi se çfarë i thanë. Mirëpo, në momentet kur iu kthye debatuesi, fjalët e saj zunë vend.

Trump ishte në pozita mbrojtëse përsëri për punën e Vladimir Putinit. Se pse nuk arriti dot asnjëherë gjatë këtyre tre debateve të thoshte ndonjë fjalë kritikuese për presidentin e Rusisë, sa për sy e faqe, vetëm ai e di.

Duke cituar nga Wikileaks, ai u përpoq të hidhte dyshime mbi ndershmërinë në punë të ish-Sekretares së Shtetit, por kur ajo tha se faqja e internetit po vepronte për llogari të Rusisë dhe kritikoi ndërhyrjen ruse në zgjedhjet amerikane, Trump përsëri kaloi në mbrojtje të Moskës, duke thënë se nuk dihet se kush i ka vjedhur emailat e demokratëve.

Hillary Clinton i kujtoi që 17 agjensi shtetërore të zbulimit, kundërzbulimit, të mbrojtjes dhe sigurisë kombëtare kanë thënë se vjedhja elektronike është kryer nga elemente të lidhur me qeverinë ruse. Dhe kur Trump përsëri tha se nuk e beson, ajo iu kthye duke i thënë se si ka mundësi që mban anën e Putinit dhe jo të agjensive amerikane.
Trump u justifikua se nuk e kishte takuar ndonjëherë Putinin dhe se Putini “nuk ishte shoku i tij i ngushtë”. Por ai përsëriti argumentin e çuditshëm se Putini kishte thënë fjalë të mira për të, ndërsa nuk kishte aspak respekt për Hillary Clinton dhe për Presidentin Barack Obama.

Ai i doli kështu në shteg kandidates demokrate që i tha se merret vesh se pse nuk e pëlqen Putini atë. “Ai preferon të ketë një kukull në Shtëpinë e Bardhë”.

“Ti je kuklla”, u përgjigj si në një sherr fëmijësh Donald Trump. Po fjalia e Hillary Clinton ishte djegëse.
Ndoshta momenti më i mirë për kandidaten demokrate ishte në segmentin për tregëtinë e jashtme, aty ku Trump duhej të kishte fituar lehtë.

Aty ishte Clinton që e ktheu debatin në çështje personale duke i kujtuar se retorika e Donald Trump për vendet si Kina që po na marrin vendet e punës është boshe. Duke marrë një shembull, ajo tha se Kina po na manipulon në treg me punën e çelikut. Mirëpo, Donald Trump është hipokrit, tha ajo, sepse kur ndërtoi Kullën Trump në këtë qytet, zgjodhi të përdorte çelikun kinez duke përbuzur çelikun amerikan. “Preferoi t’u jepte vende pune kinezëve, në vend që të t’u jepte vende pune amerikanëve”. Fjalia u troket në zemër zonave ish-industriale të shpartalluara nga konkurrenca prej tregëtisë së jashtme, pika ku Trump duhej të fitonte ndaj Clinton.

Clinton erdhi e përgatitur edhe për rutinën e zakonshme nga Trump se ajo ka 30 vjet që është politikane dhe nuk po bën asgjë. Duke hequr paralele mes punës së saj si aktiviste për të drejtat e fëmijëve, të grave, të shëndetësisë dhe në fushën e sigurisë kundër terrorizmit, ajo i gërshetoi momentet e jetës së saj, me momentet e jetës së pa përgjegjësi publike të biznesmenit Donald Trump. “Do t’i lë amerikanët të nxjerrin përfundimet nga ky krahasim”, tha ajo.

Në një moment tjetër, të dobët për Donald Trump, ai nuk duroi dot pa i thënë “grua e ndyrë”.

Zonjës Clinton nuk i lëvizi as qerpiku, por vazhdoi e qetë argumentin e saj.

Republikanët kanë disa argumente legjitime për një numër problemesh për të cilat Demokratët nuk po formulojnë dot përgjigjet e duhura apo ende nuk po pranojnë realitetet e reja në vend. Mirëpo, në skenën e debatit të fundit, vetëm një nga dy kandidatët u soll si dikush që meriton të vihet në krye të këtij vendi të madh. Ajo ishte Hillary Clinton.

Kjo nuk është thjesht preferencë e autorit të këtij shkrimi. Është një përfundim i shumicës së anketuar pas mbarimit të debatit si dhe përfundimi gati unanim mes komentuesve të politikës. Pyetja e vetme që mbetet tani është çfarë mund ta ndalë ish-Zonjën e Parë të Amerikës që të kthehet në Shtëpinë e Bardhë, kësaj here si Presidentja e parë grua në historinë e vendit. Pas debatit të sotëm, nuk ka dyshim që Donald Trump nuk e ndalon dot.