Turqia shton presionet. Çfarë i ka premtuar Rama Erdoganit për investimet e Gulen në Shqipëri?

Partneriteti strategjik i shpallur me Turqinë dhe i proklamuar me të madhe nga kryeministri Edi Rama, duket se ka edhe ca detyrime të cilat ashtu si ka bërë gjithmonë me gjërat madhore kryeministri, nuk janë bërë asnjëherë transparente.

Nuk ka asnjë informacion se çfarë marëveshje ka firmosur Edi Rama me presidentin Erdogan në vizitën e tij të fundit në Ankara, e cila përkoi me grushtin e shtetit të dështuar, por pala turke ka intesikfikuar presionin e hapur ndaj Tiranë. Vetëm nga mediet u mësua, se gjatë asaj vizite Erdogan i ka kërkuar Ramës që të veprojë me investimet e armikut të tij Fetullah Gulen në Shqipëri, duke i larguar ato.

Nuk dihet se cila ka qenë përgjigjia e kryeministrit shqiptarë për këtë çështje, por fakti që ambasadori turk në Tiranë disa herë ka kërkuar llogari që këto masa të merren sa më shpejtë, tregon se Rama mund të ketë lëshuar ndonjë premtim të cilin tani duket “nuk ka këllqe”, ta mbajë.

Edhe mbrëmë ambasadori turk në Tiranë, Hidayet Bayraktar ka folur hapur për këtë çështje gjatë një interviste për emisionion Diplomaticus, në “News 24”.

“Nuk duhet të lindë asnjë perceptim kërcënues me burim FETO-n nga territori i Shqipërisë drejt Turqisë. Në këtë çështje ne besojmë se shteti shqiptar do të tregojë ndjeshmërinë e duhur dhe në bashkëpunim me njëri-tjetrin do të zhduken zgjatimet e FETO-s, që veprojnë në Shqipëri dhe që strehohen në këtë vend të bukur. Për shumë vite i cilësuam si ‘struktura ilegale, me pamje legale’. Ka një funksionon krejt tjetër pas pamjeve të tyre të pafajshme dhe ligjore. Po të ngresh gurin, do të shikosh se poshtë tij ka një akrep tinëzar, të gatshëm për të pickuar. Këtë dëshiroj veçanërisht ta nënvizoj dhe kam bindjen se shteti shqiptar do të hedhë hapat e nevojshëm kundër zgjatimeve të FETO-s dhe do të realizojë bashkëpunimin e duhur me Republikën e Turqisë, të cilën e shpallur “partner strategjik”, deklaroi Bayraktari me tone llogarikërkuese.

“Në Shqipëri Feto ka gjithsej 12 shkolla, nga të cilët dy në nivel universiteti, si dhe një qendër për kurset e mësimit të gjuhëve. Kanë një shtypshkronjë që shtyp librat në gjuhën shqipe të Fethullah Gylenit. Ata janë të organizuar edhe në shoqërinë civile. Një shoqatë biznesmenësh vepron plotësisht në kontrollin e FETO-s. Jemi në dijeni se librat e shtypshkronjës në fjalë u lexohen pas dyerve të mbyllura nxënësve që i kanë vënë në shënjestër nëpër konvikte. Gjithashtu shfaqen edhe videot e Gylenit. Pra ka një veprimtari të qartë të tyre për shpëlarjen e trurit. Nxënësit në konvikte mbahen nën presion. Çdo lëvizje e tyre është e kontrolluar dhe e regjistruar”, tregoi ambasadori turk për veprimtarinë e Fondacionit Gulen në Shqipëri. /Syri. net/