U dëmtua në Shkodër, Ramos rrezikon një muaj jashtë fushe

Fitorja ndaj Shqipërisë ka ardhur me kosto për mbrojtësin e Spanjës, Serxho Ramos. Kapiteni i “La Roja”-s u detyrua t’ia linte vendin debutuesit Inigo Martinez dhjetë minuta para fundit për shkak të një dëmtimi në gjurin e majtë.

Ai doli nga fusha duke çaluar dhe trajneri Julen Lopetegui konfirmoi pas ndeshjes se lojtari ka pësuar një ndrydhje. “Dëmtimi i Ramosit duket si ndrydhje, të shpresojmë që nuk është diçka serioze”, u shpreh tekniku spanjoll.

Nëse ndrydhja e shkallës së dytë konfirmohet edhe nga skaneri, atëherë 30-vjeçari rrezikon të qëndrojë një muaj jashtë fushave. Një telash më tepër për Realin e Madridit, që ka të dëmtuar edhe Marselon, Kasemiron e Modriçin.