Urdhri i Ruçit në grupin e PS-së: Mbroni ligjet në Kuvend

Deputetët socialistë dis kutuan dje, në mbledhjen e përjavshme të grupit parlamentar, në lidhje me ligjet e seancës të së enjtes. Burimet bëjnë të ditur se kryetari i grupit, Gramoz Ruçi, ka kërkuar si përherë një përgatitje serioze të ligjvënësve socialistë në mbrojtje të ligjeve dhe në debatet me opozitën në Kuvend.

Të njëjtat burime thanë se ai ka informuar që këtë të enjte do të kalojë ligji “Për disa shtesa dhe ndryshime në ligjin nr. 10.142, datë 15.5.2009, “Për sigurimin shoqëror suplementar të ushtarakëve të Forcave të Armatosura, të punonjësve të Policisë së Shtetit, të Gardës së Republikës, të Shërbimit Informativ të Shtetit, të Policisë së Burgjeve, të Policisë së Mbrojtjes nga Zjarri dhe të Shpëtimit e të punonjësve të Shërbimit të Kontrollit të Brendshëm në Republikën e Shqipërisë”, i ndryshuar.

“Kjo është një kategori për të cilën ne i kemi rritur disa herë pensionet, dhe do t’i rrisim përsëri, sepse është një shtresë që meriton të trajtohet me dinjitet, por ajo për të cilën dua të tërheq vëmendjen është këmbëngulja në këto vendimmarrje pozitive që ne kryejmë. Këto rritje duhet të vihen në dukje përmes një pune më këmbëngulëse në diskutimet parlamentare, sepse ky është vërtet një sektor prioritar, po këtu gjërat humbasin”, – mësohet të jetë shprehur Ruçi.

Ai u ka kërkuar deputetëve të mos bien në kurthin e deputetëve të PD-së. Edhe deputeti Arben Çuko u shpreh se ushtarakët e meritojnë rritjen e pensioneve, dhe ky është një premtim që PS-ja ua ka bërë atyre. Një tjetër ligj që pritet të kalojë të enjten është edhe ai për barrët e sigurisë, për të cilin ministrja për Marrëdhëniet me Parlamentin, Ermonela Felaj ka kërkuar miratim sa më të shpejtë nga Komisioni i Ligjeve. Por kryetari i Ligjeve, Fatmir Xhafaj është shprehur se duhen mbrojtur edhe kreditorët, pasi jo të gjithë janë mashtrues.