Vajza 8 vjeçe zbulon se është prekur nga kanceri i gjirit

Ajo cilësohet si pacientja më e re e prekur nga kanceri i gjirit dhe pikërisht për këtë arsye, përpara një sfide shumë të madhe për moshën e saj, është pjekur shumë dhe është bërë një zëdhënëse e vërtetë e një mesazhi që ju drejtohet të gjitha femrave.

Ajo është Chrissy Turner, aktualisht 9 vjeçe, e cila para një viti u diagnostikua nga kanceri i gjirit.

Aktualisht vogëlushja amerikane nga Utah, ndodhet në fazë shërimi për shkak të kurave të cilave u është nënshtruar dhe ka vendosur që ta ndajë eksperiencën e saj publikisht, për të sensibilizuar sa më shumë femra që të bëjnë vizita për të parandaluar përkeqësimin e situatës.

“Është shumë e rëndësishme të njohësh trupin tënd, nuk ka rëndësi sa vjeçe je. Nëse ndesheni me një gjëndër në trup, drejtohuni te mjeku për kontroll. Jeta është e bukur dhe shumë e shkurtër. Më pëlqen ta kaloj kohën me familjen dhe nuk ka gjë më të rëndësishme për mua tani”, tregon vogëlushja.

Ajo shton se e zbuloi gjëndrën rastësisht, teksa po bëhej gati të flinte, ndërsa nënës ja tregoi një ditë më vonë, duke shkuar në spital.

Nga aty nisi beteja e gjatë. “Shumë njerëz e kanë parë forcën e saj dhe janë befasuar. Ka një aftësi të jashtëzakonshme për të dhënë shpresë tek të tjerët, tha babai i saj Ted për “People”.