“Varrezat greke”, komisioni i përbashkët mblidhet më 20-21 tetor në Athinë, pak ditë pas vizitës së Metës

TIRANE- Në datat 20 dhe 21 tetor mblidhet në Athinë Komisioni i përbashkët shqiptaro-grek, i ngritur për zgjidhjen e çështjes së varrezave të ushtarëve grekë, që janë vrarë në Shqipëri gjatë luftës së 2 botërore.

Komisioni, qëllimi i të cilit është t’i hapë rrugë një proçesi human në respekt të të rënëve, ka takimin e radhës ku do të diskutohen çështjet e pazgjidhura. Mbledhja e komisionit të përbashkët zhvillohet pak ditë pas takimit të kreut të Kuvendit Ilir Meta me presidentin grek Pavlopulos, i cili duke kujtuar vuajtjet e dy popujve në të kaluarën, sidomos gjatë Luftës së Dytë Botërore, u shpreh se ka ardhur koha të përfundojë historia e të rënëve, të cilët duhet ta kenë më në fund një varr.

Kryeparlamentari Meta tha pas takimit se kjo gjë mund të realizohet, pasi Shqipëria është një vend me standarde ndërkombëtare. Sipas Metës, kërkesa e Greqisë ka gjetur një zgjidhje në vetë marrëveshjen midis dy vendeve dhe dy qeverive në fillimin e këtij procesi. Meta bëri të ditur për mediat se pas pak kohësh do të rimblidhet komisioni i përbashkët për këtë çështje. “Ne jemi një vend demokratik, jemi një vend evropian, ka standarde ndërkombëtare, të cilat jemi angazhuar që t’i respektojmë dhe në këtë drejtim besoj se do të ecet me vullnet pozitiv për të respektuar këto ndjeshmëri”, u shpreh ai.