Vrasja e Aleksandër Bardhit në kanal, arrestohen 2 persona të tjerë, kërkohet një i tretë

Zbardhet vrasja e Aleksandër Bardhit në Sarandë, pas plumbit të marrë në kofshë dhe lënë në një kanal.

Pas disa javë hetimesh dhe dy arrestimesh të mëparshme, Policia e Sarandës tha se ka vënë në pranga 2 nga 3 autorët e dyshuar të krimit: Dhimitër Cikon, 20 vjeç, banues në Ksamil, i dënuar më parë për “Trafikim Narkotikësh” dhe A.L., 18 vjeç, banues në Ksamil. Ndërkohë ka shpallur në kërkim A.Xh., 20 vjeç, banues në Ksamil, i dënuar më parë për “Vjedhje”.

Për këtë vrasje qenë arrestuar më parë Fernando Deda, 29 vjeç nga Konispoli dhe Gjergj Arapi, 15 vjeç.

Zbulimi i armës në shtëpinë e autorit

Gjatë kontrollit të ushtruar në banesën e shtetasit A.Xh., janë gjetur dhe sekuestruar në cilësinë e provës materiale 3 armë zjarri “Automatik­model 56” si dhe 3 krëhëra të mbushur me fishekë, të cilat u dërguan për ekzaminime laboratorike.

Nga ekzaminimet laboratorike që u është nënshtruar këtyre armëve, ka rezultuar se të tre armët e mësipërme kanë realizuar qitje në vendin e ngjarjes për vrasjen e Aleksandër Bardhit.

Bardhi ka vdekur në spital pasi u gjet i plagosur rëndë nga kushuriri i tij në kanal. Mendohet se vrasja ka ndodhur sepse të dyshuarit e arrestuar po i grabisnin kanabisin e mbjellë.