Zbulohet kandidati i PS për bashkinë e Kolonjës

Mjeku Ilia Stefo është kandidatura e PS për Bashkinë e Kolonjës për zgjedhjet e parakohshme pas vdekjes natyrale të ish-krybashkiakut Arben Malo.

Burime të sigurta thanë për Newsbomb.al se mjeku ka qenë fitues në të gjitha sondazhet e organizuara nga PS, përfshi këtu dhe atë të ditës së sotme. Burimi tha se të enjtën paradite grupi i deputetëve të qarkut të Korçës kanë pasur një takim me zv/kryeministrin Niko Peleshi ku kanë diskutuar për të gjitha kandidaturat e përfshira në katër sondazhet e organizuara, raporton Newsbomb. Më tej, një nga deputetët e këtij qarku ka pasur një takim me mjekun Ilia Stefo, i cili ka mirëpritur zgjedhjen si kandidaturë për kreun e bashkisë së Kolonjës.

Stefo më parë ka punuar mjek në spitalin e Ersekës, ndërkohë që prej pesë vitesh është mjek në shërbimin spitalor të Korçës.

Partia Socialiste ka preferuar të ndjekë në Kolonjë të njëjtën strategji si në Dibër, ku kandidoi mjekun Muharrem Ramën.

Presidenti Bujar Nishani ka dekretuar datën 20 nëntor për zgjedhjet e parakohshme për bashkinë juglindore.