I zbuluan gazetarët, policia shpall në kërkim pronarin e parcelave me drogë

1.592 bimë kanabisi janë gjetur dhe sekuestruar nga policia, ndërsa një person është shpallur në kërkim.

Burime nga policia bëjnë me dije për Syri.net se pranë banesës së 56-vjeçarit Çesk Gjika, në fshatin Bizë-Ishëm, iu gjetën dhe u asgjësuan bimët narkotike në proces tharje, që ishin në dy tenda të mbuluara me plasmas.

Gjithashtu, u sekuestrua edhe 1 kg e 996 gr. kanabis dhe një armë gjahu teke, që u gjendën aty pranë, në një kasolle të mbuluar me shkurre e plasmas, shtojnë të njëjtat burime.

Materialet në ngarkim të Çesk Gjikës u referuar një ditë më parë në Prokurorinë e Rrethit Gjyqësor Durrës, ndërsa 56-vjeçari është shpallur në kërkim.

Pak ditë më parë, gazetarë që ishin ngritur në fluturim me një helikopter të ministrisë së Mbrojtjes drejt një stërvitjeje të ushtrisë shqiptare në bashkëpunim me NATO-n, kanë filmuar në Bizë të Martaneshit parcela me drogë.

Vetëm pas denoncimit të pamjeve në mediat, policia është vënë në lëvizje