Zëri i Amerikës: FBI së shpejti në Shqipëri për Byronë Kombëtare të Hetimit

Zëri i Amerikës (VOA) seksioni shqip, pas miratimit në parlament të paketës ligjore të domosdoshme për vënien në jetë të Reformës në Drejtësim ka dhënë edhe disa detaje, për përfshirjen e FBI-së në veprimtarinë e Byrosë Kombëtare të Hetimit. Përveç trajnimit të anëtarëve të saj që po bëhet në SHBA, paralajmërohet se së shpejti në Tiranë do të vijë edhe një agjent i kësaj agjencie të rëndësishme në luftën kundër krimit dhe korrupsionit.

“Opozita siç kishte parlajmëruar dha votën e saj vetëm për ligjin për ngritjen e strukturave të posaçme në luftën kundër krimit të organizuar dhe korrupsionit të zyrtarëve të lartë, SPAK.

Ligji, i cili mori 122 vota në favor, parashikon dhe ngritjen e Byrosë kombëtare të hetimit, e cila pritet të funksionojë sipas modelit të FBI-së amerikane. Në fakt dhe anëtarët e saj do të trajnohen pranë akademisë së FBI-së.

Ata do të kenë në dispozicion teknologjitë më të avancuara të hetimit, ndërkohë që do të detyrohen t’i nënshtrohen dhe testit të së vërtetës. Një agjent i FBI-së amerikane do të dërgohet gjithashtu në Tiranë për të mbikqyrur aktivitetin e anëtarëve të Byrosë”, shkruan Zëri i Amerikës.