2 tonë drogë në 3 ditë në Greqi e Itali. PD: Ky është muri që po pengon integrimin

Partia Demokratike thotë se tonelatat me drogë që po kapen në Itali e Greqi janë muri që pengojnë integrimin e vendit. Duke iu përgjigjur akuzave të kryeministrit Rama se negociatat po pengohen nga opozita, PD thotë se vetëm në 3 ditët e fundit janë kapur 2 ton drogë në Itali e Greqi.

Sipas PD, realitetin me drogën nuk po e kupton vetëm Rama.

Deklarata e PD

Në tre ditët e fundit, 2 tonë drogë ka kaluar nga kufinjtë tanë për në Greqi dhe në Itali. 

1 ton në Greqi, dhe 1 ton drogë në Itali, dhe këtu bëhet fjalë për sasinë e kapur nga policia.

Kur raporti është; në 10 ngarkesa, policia fqinje arrin të ndalë vetëm njërën, përfytyroni sa drogë shqiptare ka kaluar këto ditë në Greqi dhe në Itali.

Ndërkohë Edi Rama e mohon, thotë se nuk ka drogë, nuk kemi problem me drogën, edhe pse mbarë Europa është e shqetësuar, media italiane, greke, gjermane dhe BBC japin alarmin për hashashin shqiptar që po mbulon vendet e tyre.

Droga dhe përfshirja e qeverisë në këtë biznes kriminal, është një realitet i frikshëm, që po inkriminon shoqërinë, po pushton rininë e shkollat, po shkatërron imazhin e vendit tonë, dhe është një prej mureve që po pengon integrimin europian të vendit.

Vetëm një njeri ende nuk e kupton këtë gjendje të rëndë. 

Ky është Edi Rama, i cili duke e mohuar drogën po vetëshpallet si kumbari i saj.