Aksidenti tragjik/ Vihet sinjalistikë te gropa, familjarët qëllojnë me gurë

Firma që kryen punimet në Lungomaren e Vlorës ka marrë masa ditën e djeshme, duke vendosur sinjalistikën e nevojshme para se drejtuesit e automjeteve të kalojnë përbri gropës së hapur në njërën korsi të këtij aksi, raporton “Panorama”.

Në të dy skajet e rrugës, si nga zona e Plazhit të Ri, por dhe nga zona e Ujit të Ftohtë (te Rrapi) në një gjatësi lineare prej 100 metrash janë vendosur dy tabela që tregojnë devijim të rrugës.

Gjithashtu është rrethuar me rrjeta plastike me ngjyrë portokalli gropa e hapur për të sinjalizuar jo vetëm drejtuesit e makinave, por edhe kalimtarët, sidomos gjatë natës.

Mjeti i rëndë tip skrep, që ka hapur gropën rreth 4 metra dhe që u godit me gurë nga familjarët e viktimës, teksa ishin nisur për të kryer varrimin e tij, ka lëvizur nga anash rrugës që ishte kur ndodhi aksidenti për të bllokuar rrugën që të çon direkt në gropë.

Edhe pse dita e 28 Nëntorit ishte pushim, punimet për finalizimin e Lungomares kanë vijuar në të gjithë aksin e kësaj të fundit, që nga zona e Skelës deri në Ujin e Ftohtë. Por në zonën ku ndodhet gropa, puna është ndalur dhe asnjë punonjës nuk ndodhej dje aty. Punonjësit që merren me mirëmbajtjen e kësaj rruge, dje mbushën me gurë dhe zhavorr rrugën dytësore, ku trafiku është devijuar.

Ndërsa te gropa e hapur ku mbeti i vdekur 18- vjeçari Kristi panajoti, dje kanë shkuar sërish të afërm e shokë të tij ku kanë hedhur lule. Dhjetëra qytetarë të Vlorës hodhën gjithashtu lule dje në vendin e tragjedisë. Ngjarja është komentuar prej tyre me akuza direkte për firmën e punimeve, por edhe bashkinë e institucionet e tjera, të cilat duhej të kishin inspektuar punimet.

Ndërkohë, Policia e Vlorës mbrëmjen e së dielës ka bërë arrestimin e dy përgjegjësve të punimeve në rrugë. “Në bashkëpunim me Prokurorinë e Rrethit Gjyqësor Vlorë, në kuadër të procedimit penal Nr.2361/ 2016, në lidhje me aksidentin e ndodhur më datë 27.11.2016, me pasojë humbjen e jetës së një shtetasi, është bërë ndalimi i dy punonjësve të firmës që kryente punimet në rrugën Skelë-Ujë i ftohtë, ‘Xh&M Sh.p.k’.

Të arrestuarit janë shtetasit Ilirian Tahmazi, me detyrë përgjegjës i sigurimit teknik dhe Tomorr Cena, me detyrë inxhinier zbatues i projektit. Ata janë të dyshuar për kryerjen e veprës penale ‘shkelja e rregullave të mbrojtjes në punë’, Neni 289 i K.Penal)”, bëri të ditur Policia./panorama