Ankthi në rrugën Lin-Pogradec, 1 km torturon shoferët

Aksi Lin-Pogradec në prag të fundvitit vazhdon të mbetet mes harresës dhe braktisjes. Prej më se 5 vitesh punimet që pritej t’i jepnin zgjidhje infrastrukturës në rrugën Lin-Pogradec janë kthyer në një stërmundim për drejtuesit e mjeteve që kalojnë përmes këtij aksi. Edhe këtë vit qyteti turistik i Pogradecit mbajti mbi supe kostot e kësaj pjese rruge që nuk dihet se kur do të finalizohet.

Çdo fillimsezoni turistik për Pogradecin është premtuar se do të shënonte fundin e punimeve të rrugës, por ndërsa sezonet ikin e vijnë, rruga ngelet e papërfunduar. Kur kanë mbetur pak ditë nga festat e nëntorit dhe një muaj më tej festat e fundvitit, Pogradeci ende nuk po arrin të dalë nga lista e qyteteve me probleme infrastrukturore. Në kohën kur për biznesin dhe qytetarët zgjohen shpresat se do të rriten disi të ardhurat për shkak të turizmit, ditët e festave nuk kanë mobilizuar askënd për t’i dhënë zgjidhjen përfundimtare problemit të stërzgjatur të kësaj rruge.

Edhe kur u duk se këtij problemi po i vinte fundi, një ndryshim i projektit në kilometrin e parë të rrugës sapo del nga qyteti i Pogradecit riktheu gjendjen kaotike mes pluhurit, baltës e gropave. Prej disa muajsh në këtë pjesë e njohur ndryshe edhe si “zona e Bunkerëve”, u punua për zgjerimin e rrugës dhe më tej gjithçka mbeti pezull, duke lënë në mëshirë të fatit lëvizjen në këtë segment, i cili regjistron një fluks të lartë kalimesh qoftë për turizmin në Pogradec, por edhe lëvizjen n ë drejtim të Korçës apo pikave kufitare të Kapshticës, Goricës dhe Tushemishtit.

PROJEKTI

Projekti fillestar parashikonte prishjen e dy bunkerëve që i përkasin Luftës së Parë Botërore. Ndryshimi i tij dhe vendimi për të mos i prishur këta bunkerë, të cilët mbartin shumë kujtime dhe kanë domethënie për qytetarët e Pogradecit, u vlerësua sepse në vetvete ata janë dëshmi e një periudhe historike me shumë ngjarje, por nga ana tjetër, devijimi i projektit nisi të zbatohet dhe tani ka mbetur pezull. Por përveç kësaj, edhe unaza e këtij qyteti nuk njeh asnjë investim dhe të vetmet përpjekje janë kryer nga ana e bashkisë së qytetit për mbushjen e gropave, por kjo nuk i jep një zgjidhje përfundimtare problemit.

Mosfunksionimi i kësaj pjese të rëndësishme të qytetit ka bërë që automjetet e tonazhit të rëndë të kalojnë mespërmes qytetit, duke hedhur poshtë imazhin e turistëve për Pogradecin. Për drejtuesit e automjeteve, të cilët tashmë duken të zhgënjyer nga këto punime, rruga duket se nuk do të mbarojë kurrë dhe tregohen skeptikë për zgjidhjen e situatës.

“Na lodhi kjo gjendje dhe nuk vlen të ngremë më shqetë- simin tonë. Pushtetarët zënë veshët dhe mbyllin sytë para shqetësimit tonë. Mbetëm duke shkatërruar mjetet dhe duke paguar kostot e detyrimeve të shtetit”, shprehen ata. Problem jo pak shqetësues ky mbetet edhe për mjetet e tonazhit të rëndë, të cilët, pasi rropaten në unazën e Pogradecit, duhet të kalojnë edhe këtë pjesë që është jo pak e vështirë për ta.

“Të kalosh në këtë pjesë me kamion është torturë, jo vetëm e vështirë, por edhe do një kohë të gjatë. Kaq vite dhe nuk po e mbarojnë. Rrallë s shohim ndonjë punëtor dhe themi epo do përfundojë, por brenda pak ditësh përsëri punimet ndalojnë”, tregon një tjetër. Rruga, e cila është reklamuar për standardet e larta që do të ofrojë, vit pas viti ka sjellë lodhjen e udhëtarëve dhe pushuesve, duke u bërë pengesë si për turizmin, edhe për ata të cilët duhet të kalojnë për punë./panorama