Atentati ndaj Nelgert Patës, hetimet përqendrohen në një pistë tjetër

Atentati që ndodhi më 19 nëntor në qytetin e Fierit mund të ketë lidhje me përplasjen e bandave për trafikun e drogës. Kjo pistë është duke u hetuar nga grupi që po merret me vrasjen e 34- vjeçarit Nelgert Pata.

Ai u ekzekutua me breshëri automatike nga dy persona ende të paidentifikuar, teksa i kishin zënë pritë në rrugë.

Mjeti që drejtohej nga miku i Patës, 38-vjeçari nga Delvina Ari (Ilirjan) Alinani, u qëllua me 30 plumba, ndërsa shënjestra mori plagë të rënda në kokë e trup, duke i shkaktuar vdekjen e menjëhershme. Burime nga grupi hetimor bënë të ditur se janë duke punuar në disa drejtime sa i përket kësaj ngjarjeje të rëndë që tronditi qytetin e Fierit.

Veç pistës së hakmarrjes për vrasjen e Elton Çiçës, nuk përjashtohet as ajo e trafiqeve mes grupeve rivale. Burimet nuk specifikuan nëse kemi të bëjmë me trafikun ndërkombëtar, apo nëse dyshimet kanë lidhje me kultivimin e bimëve narkotike, kryesisht në zonën e tij, Tepelenë.

Ndërkaq, miku i viktimës, Ari (Ilirjan) Alinani, i cili mbeti i plagosur në të njëjtin atentat, nuk ka bashkëpunuar me policinë, e madje dyshohet se edhe fsheh të vërtetën. Për këtë shkak ai është arrestuar nga policia me akuzën e kryerjes së veprimeve që pengojnë zbardhjen e së vërtetës.

Dy ditë më parë, Gjykata vendosi masën e sigurisë arrest me burg ndaj tij, ndonëse ai gjatë hetimit dhe marrjes në pyetje ka tentuar të mohojë lidhjen dhe njohjen me Nelgert Patën. Një ndër elementët dyshues për policinë ishin tabulatet e telefonit, ku konfirmohej komunikimi i hershëm i tyre.

Gjatë marrjes në pyetje, Alinani ka tentuar të mohojë faktin që të ketë pasur dijeni se personi për të cilin ai punonte si taksist gjatë tri ditëve të qëndrimit të tij në Fier kishte probleme dhe se ishte në kërkim nga policia.

Një tjetër fakt që fundos plotësisht pretendimet e Alinanit është edhe makina me të cilën ai dhe viktima po udhëtonin ditën e ngjarjes.

Hetimet zbuluan se makinën tip “Volksëagen”, Alinanit ia kishte dhuruar 34–vjeçari nga Memaliaj.

Ai e kishte blerë atë disa kohë më parë dhe ia kishte dhënë mikut të tij. Hetuesit dyshojnë se Ari (Ilirjan) Alinani ka informacione mbi konfliktet e Patës dhe se mund të ketë të dhëna të vlefshme edhe për autorët e atentatit, apo porositësit e tij.