Audio-përgjimi/ Beqaj: Ja e verteta me drejtorin e shkarkuar të Tropojës

Ministri i Shëndetësisë, Ilir Beqaj e ka rimarrë fjalën në foltoren e Parlamentit pas përplasjes që pati disa minuta më parë me deputetët e PD-së.

Lidhur me audio-përgjimin që u shfaq mbrëmë në emisionin “Stop” në Tv Klan, ministri tha se: “Ajo bisedë është bërë me 8 Korrik 2016 dhe une e kam atë audio që nga 10 korriku. Kontrollojeni se disa fjalë të bisedës janë hequr. Ndërsa drejtori i Fondit të Sigurimit Shëndetësor të Tropojës, Ndriçim Hajdarmataj është shkarkuar më 7 Nëntor. Ku është hakmarrja këtu?!”

“Pse duhet të prisja unë 4 muaj për këtë vendim? Po ua përsëris Ai është kapur në shkelje ligjore nga Fondi, pasi i jepte rrogën në administratë një personi që jeton në Francë”, tha Beqaj.

Një natë më parë emisioni investigativ Stop në Tv Klan transmetoi një audio-përgjim që e kishtë regjistruar dhe denoncuar vetë drejtori i shkarkuar Ndriçim Hajdarmataj.

Ai ishte emëruar nga PS-ja si drejtor i Fondit të Sigurimeve Shëndetësore për Tropojën por muaj e fundit, me sa duket punët në parti nuk shkonin mirë.

Ministri e ka telefonuar dhe i ka kërkuar llogari se pse nuk ka marrë pjesë në mbledhjen e asamblesë së PS-së. Në fund Beqaj i thotë, madje i përsërit disa herë shprehjen “suksese në jetë”. Pra ministri i paralajmëron shkarkimin nga puna.

***

Pjesë nga biseda telefonike e Beqajt me ish-drejtorin

Ministri – Unë jam Ilir Beqaj.
Drejtori – Po. Po ministër!
Ministri – Pse s’erdhe sot në mbledhje në 10 e gjysmë?
Drejtori – Si?
Ministri – Nga ora 10 e gjysmë, pse nuk erdhe në mbledhje të Asamblesë të zgjeruar?
Drejtori – Nuk erdha në mbledhje të Asamblesë?
Ministri – Po.
Drejtori – Nuk munda të vij, pata probleme.
Ministri – Pse? Pse s’erdhe?
Drejtori – Pata arsye të miat, personale.
Ministri – Pse nuk më njoftove para mbledhjes, që nuk vij dot?
Drejtori – Si?
Ministri – Pse nuk më njoftove mua para mbledhjes, që nuk vij dot në mbledhje?
Drejtori – Po nuk kisha ndonjë pikë kontakti me juve z.Ministër. Nuk më keni njoftuar.
Ministri – Nuk e ndjeje, që duhet të vije sot në mbledhjen e Asamblesë?
Drejtori – Po nuk ë… Nuk kisha mundësi, që të tregoja ty. Mua më ka njoftuar ish-kryetari, që ka qenë ……………. dhe ato i kam njoftuar, që s’vij.

Ministri – Po pse më gënjen mua? Pse s’më njoftove që s’vij?
Drejtori – Po si të të njoftoj unë ty? Se s’kisha si të njoftoja. Për çfarë me të njoftuar?
Ministri – Si jo? Jam i deleguari. Ti e di, që jam i deleguari i partisë.
Drejtori – E di. E di unë, që je i deleguari, po s’kisha si të njoftoja.
Ministri – Po pra!
Drejtori – Ti nuk më njoftove.
Ministri -……..
Drejtori – Ti z.Ministër nuk më njoftove për mbledhje! Nuk e mendova, që mund të njoftoja ty.
Ministri – Mirë, dakord. Hajde! Të uroj suksese në jetë atëhere!