Basha tregon çfarë do të bëjë si Kryeministër: Kriminelët do t’i largoj me ceremoni

Kryetari i Partisë Demokratike është shprehur i vendosur për të larguar politikanët me rekorde politike ditën që do të vijë në pushtet.

Lulzim Basha thotë se largimi i kriminelëve nga qeveria është gjëja e parë që do të bëjë nëse PD fiton zgjedhjet e ardhshme parlamentare.

“Do të largoj kriminelët nga politika me të gjitha format dhe mënyrat. Largimi i tyre nga politika është origjina e gjithçkaje. Këta do të largohen me qeverinë time ditën e parë, me ceremoni.

Nuk do të kem ministër të Brendshëm një njeri të përfolur për krimin. Vullnet i hekurt për të larguar krimin nga politika”, është shprehur Basha në emisionin ‘Top Story’.

Gjëja e dytë që do të bëjë Basha si Kryeministër, do të jetë rimëkëmbja e ekonomisë.

“Së dyti do të çliroja ekonominë. Kam alternativë për qytetarët. Kam alternativë zhvillimi për Shqipërinë. Ekonomia shqiptare sot mbahet peng nga një grusht qeveritarësh dhe oligarkësh”, theksoi Lulzim Basha.

Kreu i demokratëve pranoi edhe gabimet e Partisë Demokratike gjatë viteve të fundit të qeverisjes kur ishte në pushtet.

“Gabimi kryesor, harruam që ishim aty për t’u shërbyer njerëzve. Një pjesë filluan t’i shërbenin vetes së vet dhe oligarkëve. Një pjesë e tyre kanë fituar në mënyrë të pandershme gjatë qeverisjes tonë. Forca ime është që unë i pranoj dhe kam reflektuar për këto”, deklaroi Basha.

Pranimi i gabimeve dhe reflektimi, tha kryetari i opozitës, është një nga arsyet që qytetarët duhet t’i besojnë platfmorës së PD dhe t’i japin votës në zgjedhjet e 2017.  /SYRI.net/