Belgjikë, 7 vite burg për kreun e bandës shqiptare të drogës

Gjykata belge e Bruges ka dënuar me 7 vite burg kreun e një bande shqiptare të kultivimit të kanabisit, raportojnë sot mediat lokale.

Për Driton K., prokuroria ka kërkuar 10 vite burgim. Në proces ishin të përfshirë 22 të pandehur, 5 prej të cilëve u liruan nga gjykata.

Sipas hetuesve, banda ka kultivuar 11 plantacione me kanabis në banesa që merreshin me qira. Grupit shqiptar i janë sekuestruar edhe dhjetëra mijëra euro.

Përgjimet kanë zbuluar se Driton K., ishte në krye të bandës. Ndërsa, Liridon L., ka vepruar si krahu i tij i djathtë dhe është dënuar me 5 vite burgim, raporton media belge “HLN”. Dënime më të zbutura kanë marrë të pandehurit e tjerë.