Bllokohet integrimi, Edi Rama ikën nga Shqipëria për festat e Nëntorit

Kryeministri Edi Rama është nisur drejt Italisë për fundjavë pasditen e sotme dhe mesa duket nuk do të jetë në Shqipëri për festat e Nëntorit, që kanë të bëjnë me pavarësinë dhe çlirimin e vendit.

Lapsi.al ka publikuar një foto të Edi Ramës në avion, i cili shoqërohet në këtë udhëtim nga bashkëshortja Linda Rama dhe kryebashkiaku i Durrësit Vangjush Dako.

Ndërsa, të hënën Rama do të jetë në Berlin për t’u takuar me Kancelaren Angela Merkel, ku pritet të diskutohet në lidhje me qëndrimin e Gjermanisë nëse është pro apo jo hapjes së negociatave për Shqipërinë.

Dje, deputeti gjerman Krichbaum deklaroi qartë se do të kërkojë në Bundestag që Shqipëria mos të hapë negociatat pasi nuk ka përmbushur kushtet. Kjo gjë nuk i pëlqeu aspak Kryeministrit Edi Rama, i cili sot akuzoi kreun e demokratëve Lulzim Basha se takohet skutave me deputetë të huaj për të bllokuar Shqipërinë. Nervozizmi i Ramës në këto akuza të tij kuptohej qartë.