Botëror me 40 apo 48 ekipe? Formulën e mban peng… Shqipëria

Presidenti i FIFA-s, Xhani Infantino, ka mbledhur në këtë mesjavë në Francë përfaqësues nga të gjitha konfederatat futbollistike botërore për të diskutuar mbi zgjerimin në të ardhmen të pjesëmarrësve në Kupën e Botës. Infantino është i mendimit që ajo të zgjerohet, nga 32 pjesëmarrës në 40 apo 48.

Por ndonëse të gjithë duken parimisht dakord për një gjë të tillë, formula nuk është vendosur dhe do të diskutohet në javët e ardhshme pasi ajo që e pengon në njëfarë mënyrë është pikërisht kombëtarja shqiptare e futbollit.

“Unë shpreha opinionin tim se duhej zgjeruar numri i ekipeve dhe propozova një format me 40 kombëtare. 10 grupe me nga 4 skuadra apo 8 grupe me nga 5, të dy variantet po studiohen”, shpjegoi Infantino për “L’Equipe”.

“Nga kjo pikëpamje, i japim më shumë mundësi disa ekipeve që të marrin pjesë. Por nga pikëpamja sportive, ka një problem të vogël se aktiviteti nuk do të ishte shumë linear. Ne kishim shembullin e Shqipërisë në Europian, të cilës iu desh të priste një javë para se të mësonte nëse ishte kualifikuar. Ndaj më pas u hodh ideja e një turneu me 48 skuadra, me një play-off para se të fillojë faza në grupe”, tregoi Infantino variantin e radhës që po studiohet.

Është e qartë se askush nuk dëshiron që të përsëritet situata e Shqipërisë e cila priti më kot e grumbulluar në Francë për katër ditë me radhë duke ndjekur ndeshjet para se të largohej nga turneu. Ndaj çdo formulë do të studiohet për të evituar një gjë të ngjashme, ndërsa nuk është aspak çudi që të vihet dorë edhe në formatin e Europianit për ta modifikuar që të mos ketë “Shqipëri të tjera” në të ardhmen.