I çmendur apo guximtar/ Britaniku në përpjekje për të notuar përtej Oqeanit Atlantik

Një britanik 38-vjeçar është nisur në një udhëtim prej 3.200 km, nga Senegali në Brazil, duke kërkuar të bëhet i pari person që noton përtej Oqeanit Atlantik. Ben Hooper, një ish-polic ushtarak që është stërvitur për këtë sfidë që prej 2013, pret ta kryejë këtë rrugëtim për 4 deri në 5 muaj. Ai u nda nga admiduesit e tij në Brazil, para se të vinte në plazhin Monaco në Senegal, për të nisur udhëtimin e tij drejt ishullit Goree. Hooper, me një gjatësi 1.80 m, do t’i duhet të notojë mes deteve të trazuar dhe zonave me peshkaqenë për të arritur destinacionin e tij, Brazilin.

“Jemi këtu. 12 milionë metra plus stërvitja, mbi 400.000 paundë pajisje dhe sponsorizime dhe një skuadër e pabesueshme. Po nisemi për të treguar se asgjë nuk është e pamundur. Dua të grumbulloj 1 milionë paund për bamirësi.”

Hooper ka patur pasion notin që prej moshës 5-vjeçare. Ai tha se i lindi ideja e sfidës së Atlantikut, gjatë kohës kur luftonte me depresionin. Udhëtimi, që ka për qëllim të grumbullojë 1 milionë paund për bamirësi, është vonuar disa herë. Në ditët e fundit, tre anëtarë të ekuipazhit hoqën dorë nga projekti para se ai të fillonte, duke shprehur shqetësime mbi sigurinë dhe gatishmërinë e veglave.
“Ka qenë një udhëtim me ulje ngritje që nga fillimi deri në fund në këto tre vitet e fundit. Isha i vendosur që do të niseshim. Dje ne thyem diçka në anije dhe në këto raste ti mendon, çfarë po përpiqet të më bëjë universi? Siç mund ta shihni, të dyja anijet janë këtu dhe është koha të ikim, kjo është e gjitha. Udhëtimi ka qenë i pabesueshëm.”

Në zona veçanërisht të rrezikshme, Hooper do të mbajë një kostum të kamufluar dhe do të përdorë kanaçe me kërc të prishur peshkaqeni, që duhet të veprojë si ilaç natyral. Britaniku ka për qëllim të notojë 12 orë në ditë në 2 sesione dhe më pas të pushojë në bord së bashku me 9 anëtarët e ekuipazhit dhe qenin e quajtur Tank. Anijet janë mbushur me ujë, ushqime si dhe një pemë Krishtlindjesh. Për të shmangur lodhjen, Hooper tha se ai do të mendojë për vajzën e tij, por gjithashtu do të mendojë për eksplorues si Ranulph Fiennes, i cili kapërceu Antarktikën pa ndihmë dhe që po mbështet këtë mision.

“Mendërisht jam i lodhur, por kështu janë këto punë. Nuk do të jem aq i lodhur tani sa do të jem në 2 ose 3 muajt e ardhshëm. Më duhet të iki. Jam pak nervoz, jam qenie njerëzore. Kam frikëra dhe nuk dua të zhgënjej skuadrën time apo vajzën time, e aq më pak ndjekësit dhe bamirësinë.”
Gjatë qëndrimit 45-ditor në Dakar, Hooper fitoi edhe një mik. Mamadou Sen, me të cilin ai u takua në plazh teksa stërvitej, tha se menjëherë u ndje pjesë e skuadrës dhe donte të ishte pjesëmarrës në këtë projekt. Edhe pse Sen ishte entuziast për nisjen, ai tha se ishte e vështirë të ndahej nga familja e tij.
“Po punoja këtu kur u njoha me Ben dhe ai më tregoi për projektin e tij. Fillova ta shoqëroja në stërvitje. Shpesh ai më thoshte se duhej të vija.

Nuk isha dakord në fillim, por bisedova me familjen time dhe në fund, nuk mund ta lija ta bënte i vetëm këtë gjë. Prandaj vendosa ta shoqëroja.”
Nigel Taylor-Schofield, kapiten i njërës prej anijeve, tha se krahu i timonit ishte thyer në vigjilje të nisjes dhe ishte dashur të riparohej brenda natës.
“Do të jetë një sfidë interesante për artin e lundrimit. Jam mësuar të kaloj Atlantikun në 2 ose 3 javë. Do ta bëjmë këtë gjë në 3, ndoshta 4 muaj. Prova e vërtetë është të ngadalësojmë anijen. Ben noton rreth 4 km/h dhe më duhet ta ngadalësoj varkën në atë shpejtësi.”
Përveç deteve të ashpra, një tjetër sfidë do të jetë kalimi i zonës me presion të ulët pranë vijës së Ekuatorit e njohur si Doldrums, ku anijet mund të ngelen për javë të tëra.

“Të gjithë fëmijët që po më ndjekin, nëse mund të marrin diçka nga kjo dhe të bëhen çfarë ata duan, atëherë kjo është më e rëndësishmja. Kurrë mos hiqni dorë nga ëndrra juaj sepse unë nuk e bëra dhe tani jam në Dakar, gati për t’u nisur. Kjo është e vetmja gjë që ka rëndësi.”
Francezi Benoit Lecomte pretendon të ketë notuar Atlantikun në 1998, por kjo nuk është njohur nga libri i Rekordeve Guinness dhe Hooper thotë se ritmi i tij është i pamundur. Kjo sfidë e britaikut po ndiqet edhe nga Chief Productions, në bashkëpunim me Luek Productions, që do të krijojnë një dokumentar me përpjekjet e 38-vjeçarit./ora