Dështon sërish seanca gjyqësore ndaj Mark Frrokut dhe ngërçi fashikujve

Ka dështuar sërish seanca gjyqësore ndaj ish-deputetit Mark Frroku. Kësaj radhe, nuk janë paraqitur avokatët në seancën ku pritej të verifikoheshin fashikujt e gjykimit.

Sipas prokurorisë janë 29, por gjykata deklaron se disponon 27. Në datën 22 nëntor, në procesin gjyqësor ndaj ish-deputetit Mark Frroku, i akuzuar për vrasje, mosdeklarim të pasurisë dhe ndërtim të paligjshëm, pas pyetjes së dëshmitarëve, ku të fundit ishin oficerët e policisë belge, prokuroria vijoi me administrimin e provave shkresore. Por, nga verifikimet rezultoi se numri i fashikujve sipas prokurorisë nuk ishte i njëjtë me ato që dispononte gjykata.

Më konkretisht, përfaqësuesit e akuzës deklarojnë se fashikujt janë nga 1 në 29, ndërsa gjykatës i rezultojnë 27. Po ashtu, në fashikullin 18, sipas prokurorisë, ndodhen 536 fletë, ndërsa gjykata konfirmon se në fashikull ka 426 fletë./Dita/

Përballë këtyre mosrakordimeve, prokurorët Adriatik Cama dhe Anisa Qilimi kërkuan shtyrjen e seancës, në mënyrë që të verifikonin fashikujt dhe për të kuptuar nëse ato mungojnë.

Në këtë moment ka ndërhyrë edhe vetë i pandehuri Frroku, i cili hodhi akuzua për spekulime ndaj tij, ndërsa deklaroi se oficerët e policisë belge që dëshmuan kundër tij duhej të arrestoheshin për deklarim të rremë.