Detaje të reja për imamin e vetëshpallur në Dibër. Xhezair Fishti i arrestuar edhe në Egjipt për terrorizëm

Imami i vetëshpallur i xhamisë së fshatit Kastriot në Dibër, Xhezair Fishti që tashmë është arrestuar për terrorizëm, dyshohet se është prangosur vite më parë në Egjipt për të njëjtën akuzë.

Zyra e Interpol-Tiranës pranë Policisë së Shtetit, i ka kërkuar zyrave qendrore të dhëna për shqiptarin Xhezair Fishti. Kjo kërkesë është bërë për shkak se shërbimet sekrete kanë njoftuar se imami i vetëshpallur i xhamisë së fshatit Kastriot në Dibër, është prangosur disa vite më parë në Egjipt për akuzën e terrorizmit.

Këto burime thonë se ai ka qëndruar për disa muaj në burg, nga ku është liruar pasi prokuroria nuk ka arritur të provojë akuzën e ngritur. Bashkë me Fishtin, mësohet se janë arrestuar edhe disa shtetas egjiptianë, studentë të teologjisë, disa prej të cilëve janë dënuar.

Për këto të dhëna, burimet thonë se është kërkuar nga zyra qendrore e Interpolit t’i kërkojë autoriteteve egjiptiane të dhëna për rastin e Xhezair Fishtit. Nga ana tjetër, burimet pranë antiterrorizmit të Policisë së Shtetit, i thanë ABC News se Fishti ka udhëtuar disa herë jashtë Shqipërisë, kryesisht drejt Suedisë, i ftuar nga besimtarë të tjerë myslimanë ku edhe ka mbajtur ligjërata fetare në ambientet e përshtatura për falje nga besimtarët shqiptar.

E gjithë veprimtaria e tij fetare, si në Shqipëri dhe jashtë saj, thonë burimet pranë organit të akuzës po verifikohen. Ndërkohë ai vazhdon të qëndroi në qeli me masën e sigurisë “arrest me burg” dhënë nga Gjykata e Shkallës së Parë për Krime të Rënda, i dyshuar për veprën penale të “akteve terroriste” të mbetur në tentativë dhe “nxitje të grindjes dhe urrejtjes fetare” në bashkëpunim.

Bashkë me Fishtin, me urdhër të prokurorisë janë arrestuar pak ditë para ndeshjes Shqipëri-Izrael edhe shtetasit Bekim Protopapa me profesion mjek, shtetasi Ergys Faslija dhe ish-efektivi i forcave komando të Ushtrisë Medat Hasani.

Të katër shqiptarët, dyshohet se do të ndihmonin disa shtetas nga Kosova dhe Maqedonia, të cilët po planifikonin kryerjen e akteve terroriste në Shqipëri, gjatë ndeshjes së futbollit mes kombëtares shqiptare dhe asaj izraelite që do të zhvillohej në stadiumin “Loro Boriçi”.