Donald Trump paguan 25 milionë dollarë: Mbyll padinë për “Trump University”

Presidenti i sapozgjedhur amerikan, Donald Trump ka rënë dakord që t’u paguajë 25 milionë dollarë ish-studentëve të të ashtuquajturit Universiteti Trump, që e kishin paditur për mashtrim

Një dalje në gjyq do të kishte qenë turpëruese për njeriun që po formon kabinetin me të cilin do të qeverisë Shtëpia e Bardhë.

Avokati i Organizatës Trump tha se do të kishin fituar në sallën e gjyqit, po për shumë arsye vendosën që të arrinin një marrëveshje me paditësit.

Përfaqësuesit e rreth 6,000 ish-studentëve thanë se ata ishin mashtruar, nga një pseudo-shkollë që u kishte premtuar përgatitje serioze për biznesin e pronave të patundshme.

Prokurori i Përgjithshëm i Shtetit Nju Jorkut, Eric Schneiderman, i cili i ishte qepur manjatit njujorkez qysh në vitin 2013, e quajti mbylljen e çështjes një fitore ndaj një njeriu “që ka mashtruar mijëra amerikanë të pafajshëm”.

Schneiderman tha se marrëveshja në tavolinë përfshinte edhe pagesën e një gjobe prej 1 milion dollarësh për shtetin e Nju Jorkut, për shkelje të ligjeve shtetërore për arsimin, duke e quajtur programin e tij “universitet”, ndonëse nuk ofronte ndonjë gradë apo shkollim tradicional.

Nuk është i vetmi rast për të cilin Trump është akuzuar për mashtrim.

Po ishte ndoshta një shpëtim për fushatën e tij presidenciale që gjykatësi vendosi që çështja të mos dilte në gjyq deri pas zgjedhjeve. Demokratët u ankuan shpesh se ndryshe nga ky rast, gjykatësi që shqyrtoi rastin e mesazheve të Hillary Clinton pranoi kërkesën për hapjen e tyre për publikun përpara zgjedhjeve. /Ilkyriapress