Dreka degjeneron në sherr, shqiptari grushte e thikë kunatit në tavolinë

Një drekë në një familje shqiptare për pak është kthyer në tragjedi. Mediat italiane raportojnë se ngjarja ka ndodhur në një familje shqiptarësh në Cupra Marittima, ku familjarët ishin bashkuar në një drekë.

Në bisedë e sipër, nuk dihet se çfarë debati shërbeu shkak për shpërthimin e një sherri mes kunetërish.

Policia ka njoftuar se fillimisht nisën batuta, fyerjet, sherri me fjalë, e më pas grushtet. Nuk mjaftoi me kaq, pasi një nga shqiptarët rrëmbeu thikën dhe iu vërsul për të qëlluar kunatin, në tryezën e drekës.

Ai tentoi të mënjanoi, por thika e goditi në dorë duke i shkaktuar plagë dhe gjakrrjedhje. Familjarët të alarmuar kërkuan ndihmë dhe në vend mbërriti policia, e cila prangosi autorin, një shqiptar 50-vjeçar, emri i të cilit nuk është bërë i ditur.