Duam të besojmë Edin e Lindës, por nuk na lejon Edvini i Kristaqit

“Është një investim gjigant, misterioz, i cili të lë pa frymë kur e sheh”, deklaroi sot ministri i Brendshëm Saimir Tahiri në fjalën e tij gjatë inaugurimit të “Bunkerart 2”, me hyrje në qendër të Tiranës, fiks në oborrin e dikasterit që drejton.

Që investimet e Enver Hoxhës për tu mbrojtur nga armiqtë e shumtë të tij imagjinarë ishin gjigante si edhe ky tunel-bunker, tashmë nuk është ndonjë gjë e re që prisnim ta zbulonte Tahiri dhe shefi i tij Edi Rama. Edhe që kjo kujtesë për krimet e diktaturës “të lë pa frymë”, nuk diskutohet. Por ky i fundit zbuloi me këtë rast edhe autorësinë e idesë së krijimit, të këtij biznesi-muze duke “harruar diçka” pa thënë.

Kur të gjithë hamendësonin se ideja ishte e italo-shqiptarit, botuesit Carlo Bollino që po zgjeron rrjetin e këtij lloj biznesi pas atij në Dajt, “Bunkerart1”, kryeministri surprizoi me fjalët e tij.

Gjithsesi në fjalën e tij Rama u kujdes që të nxirrte blof të gjithë ata që e kanë kritikuar dhe kundërshtuar këtë ide, duke e quajtur si një evokim të asaj periudhe të errët. Por kryeministri me një fjali të vetme ua mbylli gojën të gjithëve. Sipas tij kjo nuk është një vepër për të ngjallur nostalgjinë ndaj epokës së komunizmit më të egër dhe gjakatar në Europë, por një muze i kujtesës së viktimave të diktaturës. Shumë bukur e ka thënë, por ashtu si thamë më lartë ka “harruar” diçka të vogël fare.

A do të ekspozohet në këtë muze të krimeve të diktaturës edhe firma e babait të tij Kristaqit, e cila bëri që një poet i talentuar, në kulmin e moshës së rinisë, Havzi Nela, të përfundonte në litar?

Hajde se po e besojmë Edin e Lindës, që ideja e samitit të Diasporës ishte e bashkëshortes së tij, dhe kjo e muzeut e biznesmenit-botues Carlo Bollino. Por për qëllimin e vërtetë të kësaj sipërmarrje nuk na lë të besojmë Edi i Kristaqit, përderisa jo vetëm nuk ka kërkuar ndjesë për babanë, por as denjon ta zërë në gojë rolin e tij në diktaturë.

Prandaj le ta gëzojë “Bunker2” Bollino, kurse firma vrastare e babait të kryeministrit, nuk ka problem se nuk ka shans të ekspozohet aty, pasi ajo është në memorien e gjithë atyre që kanë vuajtur nga diktatura. Mund të fshijë e bojatis çfarë të dojë Rama sa të jetë kryeministër në këtë vend, por memorien kolektive nuk ka shans ta retushojë dot!