Edhe me Trumpin, Amerika do të jetë superfuqi botërore unipolare

Shkruan: Prof. Dr. Mehdi Hyseni

Barometri diplomatik

*** Këtë e ka pohuar edhe presidenti i ri Donald Trump, se “ ka ardhur koha që të unifikohet dhe të jetë e madhe Amerika. Premtoj se, do të jem president i të gjithë amerikanëve. Kjo është më e rëndësishmja për mua.-Do ta rimëkëmbim vendin, ekonominë, zhvillimin, mirëqenien, shkollat, spitalet, autostradat… Amerika do të jetë më e mira. Amerika do të ketë marrëdhënie të mira me të gjithë ata, që dëshirojnë ta kenë mirë me Amerikën.”

Natyrisht se Donald Trump, do ta përligjë konceptin e konservatorizmit amerikan (sepse në saje të këtij koncepti, ai, në mënyrë atraktive u bë President i Amerikës). Mirëpo, askush nuk duhet të ushqejë iluzione politike, se Donald Trump, do të jetë reformator radikal i politikës së brendshme dhe të jashtme të Amerikës, që çdo gjë të ndryshojë në themel, duke filluar nga e para sipas doktrinës së re të personifikuar me emrin e tij. Përkundrazi, do të jetë pauses dhe rimëkëmbës i veprave, i idealeve, i vlerave, i parimeve dhe i interesave vitale të kombit dhe të shtetit të Amerikës së ndërtuar, të zhvilluar dhe të afirmuar nga 44 presidentët e mëparshëm (1789-2017).

Rusia dhe Serbia kot dezinformojnë opinion botëror!

Sepse Presidenti i sapozgjedhur amerikan Donald Trump nuk do ta ndryshojë politikën ndaj Ballkanit, as ndaj Evropës, pavarësisht nga dëshira e Rusisë së Vladimir Putinit dhe e Serbisë së Vojislav Sheshelit, që Moska krahas Uashingtonit (sikurse dikur në erën e sistemit bipolar të marrëdhënieve ndërkombëtare, gjatë periudhës së luftës së ftohtë 1948-1989) ta ketë fjalën kryesore në zgjidhjen e problemeve dhe të konflitkeve të ndryshme ndërkombëtare, si dhe Beogradi ta ketë rolin kryesor ( si hegjemon) në Ballkan. Kjo nuk do të ndodhë kurrë, sepse do të vinte në shprehje shthurja e Rendit të Ri Botëror, që do të thoshte fundin e sistemit unipolar në marrëdhëniet ndërkombëtare.

Prandaj, sidomos Rusia dhe Serbia nuk kanë arsye pse t’i gëzohen aq shumë zgjedhjes së Donald Trumpit President të SHBA-së, sepse Amerika nuk do të braktisë rolin e saj si superfuqi globale NUMËR NJË në botë, por do të vazhdojë kursin e deritashëm, që të jetë shtet edhe më i fuqishëm si ekonomikisht, politikisht, ashtu dhe ushtarakisht, duke pasur fjalën kryesore në zgjidhjen e problemeve ndërkombëtare.

Me gjithë propagandën astrologjike serbomadhe të politikës shesheliste të Beogradit, se gjoja presidenti i ri i SHBA-së, Donald Trump, do ta ndihmojë Beogradin për ta ritkhyer Kosovën nën Serbi, kjo nuk do të ndodhë dot për faktin se, do të vinte në shprehje zhbalancimi i marrëdhënieve dhe i interesave politike dhe strategjike të Amerikës me aleatët e saj evropianë perëndimorë (NATO dhe BE), si dhe me 100 shtete të tjera të bashkësisë ndërkombëtare, të cilat deri tani e kanë njohur Republikën e Kosovës (2008-2016).

Është e kuptueshme dhe e pranueshme se, presidenti i ri Donald Trump, do të mbështetë idenë e konservatorizmit amerikan, por kjo në asnjë kuptim nuk do të thotë se ai do t’i heqë “vizë të kuqe” doktrinës dhe praktikës së politikës së deritashme të Uashingtonit, që Amerika të “abstenojë” si superfuqi botërore nga sistemi unipolar i marrëdhënieve ndërkombëtare (1989-2016). Përkundrazi, Trumpi, do ta forcojë edhe më shumë rolin e Amerikës në skenën ndërkombëtare qoftë si faktor kryesor politik, qoftë si faktor ekonomik dhe ushtarak në dimensione globale.

Urime z.Donald Trump posti i Presidentit të Amerikës!

Për shqiptarët e Ballkanit, është krejt njësoj se kush zgjedhet president i Amerikës, Donald Trump ose Hillary Clinton, sepse demokratët dhe republikanët kanë merita të përbashkëta historike, politike, diplomatike, ushtarake dhe humanitare për shpëtimin, për çlirimin dhe për pavarësimin e Kosovës nga Serbia (1999). Këtë, de fakto dhe de jure e vërtetuan ish-presidentët e Amerikës Bill Clinton (demokrat) dhe George W. Bush (republikan). Këta të dytë janë heronj të Kosovës.

Pra, në zgjedhjen e Donald Trump president i ri i Amerikës, shqiptarët (pavarsisht se kanë votuar për Trumpin apo Hillary Clinton) nuk kanë asnjë arsye, që të dyshojnë në mbështetjen e politikës së Uashingtonit zyrtar, sepse edhe republikanët janë dëshmuar mbështetës dhe miq të mëdhenj të shqiptarëve me rastin e çlirimit dhe të pavarësimit të Kosovës nga Serbia kolonialiste dhe gjenocidale, siç ishin ish-presidentët George Bush dhe George W.Bush. Sekretarja e State Demartamentit Condoolezza Rice, senatori Robert Joseph “Bob” Dole, senatori Joe Lieberman, i cili i pat dhënë mbështetje të fuqishme UÇK-së, duke pohuar se “ The United States of America and Kosovo Liberation Army stand for the same human values and principles. Fighting for the KLA is fighting for human rights and American valaues.”. Senatori John McCain, kongresmeni Joseph J. DioGuardi (njëri nga forcat centrifugale të ngritjes dhe të afirmimit të çështjes së Kosovës në Kongresin Amerikan) etj.

Edhe presidenti i ri i Amerikës, Donald Trump, do t’i mbështetë shqiptarët në Ballkan sikurse ish-presidentët Bill Clinton , George W.Bush dhe Barack Obama

Këtë shpresë dhe besim tonin, pa asnjë dyshim dhe rezervë ndaj presidentit të ri amerikan Donald Trump, e mbështetë, edhe ky vlerësim i ish-kongresmenit me origjinë shqiptare Joseph J.Dioguardit, i cili përmes intervistës së tij dhënë TV “Vision Plus”, të publikuar në www.voal.com.ch, ka deklaruar se: “Ne, ende nuk e dimë qëndrimin e Trumpit ndaj shqiptarëve, por dimë si të bëjmë punën tonë për çështjen shqiptare. Ne duhet të përdorim fuqinë në Kongres. Këtu nuk funksionon si me Parlamentin në Kosovë, Shqipëri apo Maqedoni ku një parti kontrollon gjithçka. Ne kemi miq në Senat, siç është senatori John McCain. Ai është mik yni. Ne e dimë se tashmë ai do të drejtojë Komitetin e Shërbimit Ushtarak në Senat, që është një komitet shumë i rëndësishëm për të pasur miq pjesëtarë të tij. Dhe në Dhomën e Përfaqësuesve në Kongres ne ende kemi Dana Rohrabacher që ka qenë më i miri dhe ka shërbyer si të ishte një armë automatike. Ne kemi njerëz që nxjerrin fjalët siç dalin plumbat nga një armë automatike, në momentin që kemi nevojë për ta, për një çështje të drejtë. Ne kemi marrë fuqi nga Kongresi, pavarësisht se kush ka qenë president. Presidenti i zgjedhur Trump i njeh shqiptarët, për shkak se mijëra prej tyre punojnë në bizneset e tij në New York, dhe gëzon respekt për ta. “(Shih në: https://www.voal.ch/dioguardi-nuk-e-dime-qendrimin-e-trumpit-ndaj-shqiptareve-por-ja-si-do-te-bejme-punen-tone-per-ceshtjen-shqiptare/).

Sa më sipër (pavarësisht se kush ka votuar për Trumpin ose për Hillary Clinton), shqiptarët nuk kanë pse të “dridhen” nga zgjedhja president e Donald Trumpit, sepse ashtu foli demokracia amerikane, u zgjodh ai që fitoi vota më shumë sipas sistemit zgjedhdor të Amerikës.

Jo vetëm shqiptarët, por askush nuk duhet të ndjehet i frikësuar e as të jetë skeptik, se gjoja fitorja e Donald Trumpit, do të shkaktojë ndonjë “dridhje tektonike ” në skenën e marrëdhënive politike ndërkombëtare, sepse, atëherë, do të vinte në shprehje shthurja e Rendit të Ri Botëror e ish-presidentit amerikan George Bush (1990-2016), përkatësisht prishja dhe zhbalancimii e marrëdhënieve të Amerikës me partnerët e saj europianë perëndimorë (NATO dhe BE), si dhe me vendet e tjera të bashkësisë ndërkombëtare .

Me gjasë, pas zgjedhjes së Donald Trumpit president i Amerikës, do të ndodhin ndryshime dhe korrigjime në strategjinë e politikës së jashtme të Amerikës, kur është fjala për përcaktimin e objektivave parësore dhe prioritare të saj në funksion të mbrojtjes së interesave vitale nacionale dhe shtetërore strategjike të Shteteve të Bashkuara të Amerikës. Kjo do të ndodhë, por, assesi nuk do të jetë në disfavorin e interesave komplementare të aleatëve të saj evropianë perëndimorë.

Vërtet, zgjedhja e Donald Trump për president të SHBA-së, ishte një befasi atraktive ngase favorite ishte Hillary Clinton (për të cilën kam votuar edhe unë), por kjo nuk duhet konsideruar dhe interpretuar si ndonjë “shok” sui generis për “botën politike” të brendshme amerikane e as për atë ndërkombëtare, edhe pse Donald Trump nuk erdhi nga radhët e elites politike dhe të asaj ushtarake, por nga biznesi privat, i dëshmuar si bilioner, të cilit ia hodhën votën “ 59.085.787” zgjedhës, votë kjo, e cila sipas sistemit zgjedhor i garantoi zgjedhjen për president të Shteteve të Bashkuara të Amerikës.

Prandaj, të gjithë ne, duhet të respektojmë këtë votë të lirë, të ligjshme dhe demokratike, që bilionerit Donald Trump i bëri të mundur të zgjedhej Presidenti i 45-të i Shteteve të Bashkuara të Amerikës. –Urime, z. Trump!