Eksploziv në Fushë-Krujë pas prishjes së fejesës, Prokuroria: Burg 3 të dyshuarve

Prokuroria e Krujës ka kërkuar caktimin e masës së sigurisë “arrest me burg” për tre persona, të dyshuar si autorë të shpërthimit me tritol në ambientin e një rrobaqepësie në Fushë-Krujë. Ngjarja në fjalë ndodhi mbrëmjen e 15 nëntorit, ndërsa nga shpërthimi pati vetëm dëme materiale në ambientin privat të familjes Taga, si edhe te disa automjete që gjendeshin pranë.

Shpërthimi i tritolit ka ndodhur rreth orës 17:30, ndërsa autorë të dyshuar të kësaj ngjarjeje janë Skënder Vathi dhe nipi i tij, Erjon Tema, për shkak të një krushqie të prishur ndërmjet Vathit dhe familjes Taga. Gjithashtu, ka dyshime se edhe miku i të dyshuarve, shtetasi Ergest Duka ka qenë pjesëmarrës në veprimet e tyre. Tre personat dyshohet se kanë kryer veprat penale të “Shkatërrimit të pronës me eksploziv” dhe “Prodhimit dhe mbajtjes pa leje të armëve luftarake dhe municionit”.

HETIMI
Më datë 15.11.2016, rreth orës 17:45, salla operative e komisariatit të policisë është njoftuar në linjë telefonike se në lagjen “Punëtori” të qytetit Fushë-Krujë, pranë automjetit dhe rrobaqepësisë në pronësi të shtetasit S. Taga, është shpërthyer një sasi eksplozivi. Pas marrjes së njoftimit, policia menjëherë ka vajtur në vendin e ngjarjes dhe ka konstatuar se mbi sipërfaqen e asfaltit pranë rrobaqepësisë, e cila ndodhet në katin e parë të pallatit 6-katësh, është shkaktuar një dëmtim në formë rrethore, me përmasa 45 x 45 x 10 cm. Si pasojë e shpërthimit janë dëmtuar xhamat e rrobaqepësisë në pronësi të shtetasit S. Taga, si dhe 5 (pesë) automjete që kanë qenë të parkuara pranë rrobaqepësisë.
Sipas deklarimeve dhe nga dinamika e ngjarjes, rezulton se rreth orës 17:30, S. Taga dhe bashkëshortja e tij, F. Taga, kanë qenë në dyqanin “rrobaqepësi”, kur kanë dëgjuar zhurmën e një objekti që ka rënë para dyqanit të tyre. S. Taga ka dalë për të parë se çfarë ishte dhe ka parë një objekt të mbështjellë me lecka, i cili vinte era barut. E ka shtyrë me këmbë rreth dy metra dhe aty është dëgjuar edhe shpërthimi i tritolit. Kjo provohet edhe nga thëniet e dëshmitarëve të tjerë të rastësishëm, të cilët kanë parë në atë moment fitilin që po digjej dhe janë larguar me vrap, para se lënda të shpërthente.
Në bazë të të dhënave hetimore, rezulton se ndërmjet familjes së Skënder Vathit dhe familjes Taga ka pasur një problem të zgjatur në kohë, për shkak të një krushqie të prishur. Për këtë arsye, dyshimet e para u krijuan se vendosja e tritolit mund të ishte realizuar nga Skënder Vathi. Efektivët e policisë shoqëruan këtë të fundit, i cili gjendej në shtëpi së bashku me nipin e tij, Erjon Tema. Dy të dyshuarit kanë mohuar që të kenë lidhje me vendosjen e tritolit në dyqanin e S. Tagës, megjithëse pranojnë se ndërmjet tyre kanë një krushqi të prishur.
Skënder Vathi dhe Erjon Tema deklarojnë se janë takuar pasdite në Fushë-Krujë dhe rreth orës 16:30, pra një orë para shpërthimit, kanë shkuar në shtëpinë e Vathit, në Vorë. Ndërkohë, në rrugë operative, efektivët e policisë kanë mësuar se, gjatë asaj dite, në shoqërinë e dy të dyshuarve ka qenë edhe Ergest Duka. Ky i fundit ka mohuar të ketë qenë nën shoqërinë e Vathit atë ditë, duke pretenduar se ka qenë gjatë gjithë ditës në një kazino të qytetit. Duka e pranon se njihet me Skënder Vathin, pasi kanë qenë në të njëjtin burg para disa kohësh, por ai mohon të ketë lidhje me shpërthimin e tritolit në rrobaqepësinë e S. Tagës. Duke analizuar të dhënat e referuara të deritanishme, Prokuroria e Krujës kërkon caktimin e masës së sigurisë “arrest me burg” për tre të dyshuarit. (Gazeta Shqiptare)