Eliminimi nga Kupa, Starova: Unë së bashku me lojtarët mbaj përgjegjësi

Pas eliminimit nga Kupa e Shqipërisë, trajneri i Partizanit, Sulejman Starova ka folur i mërzitur duke theksuar se nuk e priste kurrë këtë rezultat.

Në një deklaratë për mediat, Starova e pranoi se ky eliminim ishte një disfatë e madhe për partizanin dhe përgjegjësinë e sheh te vetja dhe te lojtarët në fushë, ndaj për këtë arsye do të bëhet një analizë e thellë në klub.

“Të them dy fjalë, kjo është një disfatë për ne. Përgjegjësia është nga unë i pari dhe të gjithë lojtarët titullarë. Duhet ta analizojmë dhe duhet ta harrojmë. Ndikoi rezultati i ndeshjes së parë, sepse ishte në vigjilje para ndeshjes me Skënderbeun dhe aktivizuam të gjithë lojtarët rezervë, të themi. Megjithatë, kjo nuk justifikohet, sepse ne kaluam në avantazh në fund të pjesës së parë edhe e kaluam këtë pengesë që kishim. Lojtarëve titullarë që iu ra barra për të kaluar rezultatin, e kaluan normalisht dhe kjo nuk falet. Ne do mundohemi që të shtrëngojmë frenat, të kalojmë gjendjen”, u shpreh ai.
Kujtojmë që surpriza e madhe e raundit të dytë të Kupës së Shqipërisë është Beslidhja e cila ka arritur të eliminojë Partizanin pasi ndeshja në “Elbasan Arena” ka përfunduar me rezultatin 1-1 me skuadrën lezhjane e cila kualifikohet për në çerekfinale falë fitores 1-0 në takimin e parë.