FOTO/ PD, Basha nderon Adem Jasharin: Heronjtë e pavarësisë, nuk vdesin kurrë në zemrat e një kombi

Partia Demokratike ka nderuar ditën e sotme edhe Adem Jasharin, heroin që luftoi i pari për çlirimin e Kosovës dhe sakrifikoi gjithë familjen për këtë kauzë.

Gjatë mesditës kreu i PD-së Lulzim Basha, ish-kryeministri Sali Berisha dhe drejtues të tjerë të PD-së, kanë nderuar Jasharin pikërisht tek busti i ngritur në Tiranë.

Adem Jashari nderohet në 28 nëntor sepse në këtë ditë ai ka lindur.

Deklarata e plotë e kreut të PD-së, Basha:

Kombi shqiptar bashkohet me 28 Nëntor në festë dhe në kujtesë të sakrificës shumëshekullore për Liri dhe Pavarësi që nga 28 Nëntori i Gjergj Kastrioti Skënderbeut, 28 Nëntori i Pavarësisë së Shqipërisë me Ismail bej Vlorën.

Dhe padyshim në këtë varg datash të rëndësishme, për ekzistencën, lirinë dhe pavarësinë e kombit shqiptar, ka edhe një 28 Nëntor tjetër për të cilën i falemi Zotit si shqiptar, ditëlindjen e komandantit legjendar të Ushtrisë Çlirimtare të Kosovës, Adem Jashari, para sakrificës së të cilit dhe para familjes Jashari përkulemi sot me nderim të thellë duke kujtuar për veten tonë dhe për brezat që vijnë se heronjtë që vendosin sakrificën sublime në altarin e lirisë dhe pavarësisë, nuk vdesin kurrë në zemrat e një kombi mirënjohës.

Lavdi përjetë Adem Jasharit!

Lavdi përjetë Dëshmorëve të Kombit!

Gëzuar 28 Nëntorin!
Image