FSHF kundër Arbitrazhit Sportiv, Duka: Ku janë paratë nga lotaritë?

Federata Shqiptare e Futbollit është kundër propozimit për kthimin e Gjykatës së Arbitrazhit Sportiv nën KOKSH, pjesë e paketës së ndryshimeve të Ligjit për Sportin, i cili do të çohet së shpejti për miratim ën Parlament. Presidenti i FSHF-së, Armand Duka, ka bërë të qartë këtë qëndrim në një seancë të veçantë dëgjimore me grupet interesit që është zhvilluar sot në Komisionin Parlamentar “Për edukimin dhe mjetet e informimit publik”.

“Projekti parashikon të krijohet Gjykata e Arbitrazhit Sportiv, pranë Komitetit Olimpik, që do të gjykojë mosmarrëveshjet që ekzistojnë në sport. Ne, si Federatë Shqiptare e Futbollit, deri më sot të gjitha mosmarrëveshjet që kemi pasur i kemi zgjidhur nëpërmjet KAS të Lozanës. Kjo për arsye të eksperiencës shumë të madhe të asaj Gjykate.

Fakti që do të krijohet kjo Gjykatë e Arbitrazhit Sportiv KOKSH, duhet të detajojë se çfarë duhet të gjykojë ajo: Konfliktet mes federatave dhe KOKSH, konfliktet mes Federatave apo vendimet të Komisioneve të brendshme të Federatave? Kjo është diskutuar më parë, madje në kohën kur Komiteti Olimpik nuk ishte i regjistruar në gjykatë dhe nuk kishte si zbatohej një gjë e tillë. Mendojmë se një Gjykatë e ndërtuar rishtazi më shumë do të krijojë probleme se sa do ta ndihmojë”, janë fjalët e Dukës në këtë takim.

Ndërkaq, ai ka përmendur edhe faktin se pavarësisht ligjet shqiptare garantojnë që 0,4% e fitimeve nga lotaritë sportive t’u shkojnë Federatave për investime, përfitime të tilla nuk kanë mbërritur asnjëherë në destinacion.

“Parashikohet në projektligj, që një pjesë e fitimeve nga ana e lotarive sportive, rreth 0.4 % e tyre të shkojë për përmirësimin e infrastrukturës. Jemi të të njëjtit mendim. pasi e kemi diskutuar me kolegët e tjerë, se shifra është shumë e vogël, gati e papërfillshme për nevojat që ka sporti në Shqipëri. Ne si Federatë Futbolli, nuk e kemi marrë asnjëherë këtë bonus dhe nuk e dimë as ku ka shkuar ai. Përveçse duhet të jetë më e madhe, duhet të përcaktohet edhe mënyra se si është shpërndarë ajo. Që gjithkush të ketë mundësi që ta kontrollojë atë”, vijoi Duka.

Ndërkaq, ai nuk mendon se inspektorët e Ministrisë së Arsimit dhe Sportit duhet të jenë ata që vendosin ndëshkime për aktet e dhunës në ambientet sportive.

“Projektligji parashikon për ushtruesit e dhunës në ambientet sportive, se ata mund të dënohen nga inspektorët e Ministrisë së Arsimit. Nuk besoj se kjo gjë e ndihmon procesin. Unë, theksoj se pavarësisht cilësisë së këtij ligji, ai nuk do të ndihmojë në zhvillimin e sportit në Shqipëri, në rast se nuk do të shoqërohet nga një paketë e plotë ligjore”, ishin fjalët e Dukës në Komisionin Parlamentar.