FSHF përgënjeshtron veten: Partizani nuk ka borxhe të vjetra

Federata Shqiptare e Futbollit ka bërë një reagim zyrtar në lidhje me Fondin e Solidaritetit që klubi i Partizanit pretendon se nuk e ka përfituar. Pas reagimit të Sekretarit të Përgjithshëm të Partizanit, Gerald Burba, për “Panorama Sport”, i cili tha se FSHF nuk e ka njoftuar asnjëherë klubin e kuq në lidhje me mosdhënien e Fondit të Solidaritetit si pasojë e borxheve të mbartura nga administrata e vjetër, institucioni i futbollit ka përgënjeshtruar veten duke mohuar që të kuqtë të jenë duke shlyer borxhe të kohës së ish-presidentit Albert Xhani. Sipas reagimit të sotëm, Partizani e ka përfituar Fondin e Solidaritetit tek investimi që po bëhet në kompleksin e ri të klubit.

Reagimi i plotë i FSHF-së:
“Transparencë e detajuar për FK Partizanin
Nisur nga paqartësitë e bëra publike nga klubi Partizani në lidhje me fondin e solidaritetit, më duhet edhe njëherë të sqaroj publikisht në emër të institucionit të futbollit se FK Partizanit për periudhën e administrimit aktual nga z. Demi i është akorduar dy herë fondi i solidaritetit.

– Nga sezoni 2014-2015, fondi i solidaritetit i UEFA-s në vlerën 23 913 €. Shumë e cila e bashkuar me projekte të tjera i është akorduar FK Partizanit me kërkesën e tij dhe me vendim të K.E. për ndertimin e një fushe me bar artificial. Investim i parashikuar 250 000 €. Punimet përgatitore janë parashikuar të bëhen nga klubi dhe tapeti artificial e shtrimi i tij me vlerë 180 000 € nga fondi i solidaritetit dhe projekti HatTrick.

– Nga sezoni 2015-2016, fondi i solidaritetit i UEFA-s në vlerën 54 035 €, shumë e cila i është vënë në dispozicion FK Partizanit, i cili është njoftuar dhe me shkresë zyrtare nga FSHF.

– FK Partizanit nuk i është akorduar fond solidariteti në vitet e tjera pasi nuk ka qenë pjesë e Kategorisë Superiore.

– Administrimi aktual nuk ka trasheguar dhe nuk po shlyen asnjë borxh nga e kaluara. Investimet e bëra nga FSHF nëpërmjet projekteve të ndryshme në periudhat e mëparshme kanë qenë pjesë e pasqyrës për të gjitha klubet.

Kjo është e vërteta e mbështetur në shifra dhe në fakte, të cilat krejt normalisht një zyrtar i klubit Partizani dhe i çdo klubi tjetër mund të vijë dhe ti shohë në FSHF.

Pa u përfshirë në debate publike edhe për gjëra lehtësisht të sqarueshme, ju kujtojmë edhe njeherë se gjithçka ka qenë transparente dhe e hapur ne këtë proçes ashtu si në të gjitha proçeset qe kryen FSHF.
Kejdi Tomori
Drejtor i Sektorit të Liçencimit dhe Projekteve”/panoramasport