“Geisha” Gentiana Sula, Sigurimi, Edvini dhe Scavolini

Shkruan: Gjergj Thanasi, Tiranë

Tashmë për Rilindjen është bërë vijë sjelljeje emërimi i “geishave” dhe “samurajve” me syckat e lyer me rimel në vende kyce, që kanë të bëjnë me sigurinë kombëtare apo në sektorë e poste jashtëzakonisht delikatë e të ndjeshëm. Gentiana Sula është emërimi i radhës si “kryehapëse” e dosjeve të ish Sigurimit të Shtetit.

Informacioni i Ramës për Sigurimin

Për ta ndihmuar biologen në fjalë,që t’i hapë me efektivitet dosjet e Sigurimit të Shtetit do t’i sugjeronim që në praktikën e saj të punës të bënte publike edhe një informacion me shkrim të z. Edi Rama për Sigurimin e Shtetit. Informacioni i javës së parë të nëntorit 1988 trajton cështjen e ardhjes në Shqipëri të skuadrës italiane të basketbollit Scavolini Pesaro në kuadrin e Eurolegue për të luajtur kundra Partizanit. Ndeshja Scavolini-Partizani nuk ishte thjesht një ndeshje basketbolli, por edhe një indikacion i një mikrohapje të Shqipërisë staliniste ndaj perëndimit. Në skuadrën italiane me trajner Valerio Bianchini-n bënin pjesë edhe 2 lojtarë amerikanë. Ky ishte një eveniment për Shqipërinë staliniste i përafërt me vizitën e gazetarit të famshëm Sulzberger dekada më parë, sepse përjashtimisht në Shqipëri ishte lejuar të hynin dy shtetas amerikanë jo shqiptarë etnikë. Për specifikat dhe implikimet politike të kësaj ndeshje basketbolli Sigurimi ishte mobilizuar duke marrë masa të posacme dhe duke angazhuar njerëzit e tij ndër më të përgatiturit e ndër më të aftët për mbajtur nën mbikqyrje ekipin e Scavolini-t.

Nëse zj. Gentiana Sula do bëjë publike informacionin e të riut Ed Rama për antarët e ekipit, do të ishte një favor për shqiptarët për të mësuar më shumë për kryeministrin e tyre. Në informacion ka të dhëna të hollësishme për komentet, që bëri Bianchini gjatë vizitës në Muzeun e Krujës, apo për reagimet e shqiptarëve ndaj basketbollistit Darren Daye për shkak të ngjyrës së tij të lëkurës të ngjashme me atë të Presidentit në detyrë Obama. Me interes është edhe informacioni për basketbollistin afro-amerikan Cook. Për brezin e ri pa dyshim do të jetë tërheqëse të mësojë sesi Edi Rama informonte Sigurimin për trajnerin Bianchini-n, që bënte pyetje për bunkerët, për shpërblimin e basketbollistëve apo për rradhët e gjata në dyert e dyqaneve të bylmetit në orët e para të mëngjesit. Me interes është dhe informacioni emër për emër i basketbollistëve të Partizanit, që pranonin dhurata si atlete apo edhe canta sporti nga basketbollistët e Scavolini-t.

Zj. Gentiana mund të bëjë publike edhe shkresën e Sigurimit drejtuar Lidhjes së shkrimtarëve dhe artistëve për t’i dhënë Edi Ramës menjëherë leje (për nevojat tona) për të nxjerrë jashtë shtetit një pikturë të vetën të një vajze shqiptare të veshur me kostum popullor. Ndoshta për shqiptarët do të ishte me interes të bëhej publik edhe një informacion me firmën e drejtorit të Drejtorisë së punënve të brendshme Tiranë, Zef Loka për sh. Hekuran Isai (ministër i brendshëm dhe zv/kryeministër) dhe për Sh. Adil Carcani, kryeministër, ku ndër të tjera përmendet edhe informacioni i Edi Ramës për shoqërimin e ekipit të Scavolini-t dhe të vetë trajnerit Valerio Bianchini.

Meqenëse sot Edi Rama është VIP i politikës shqiptare, do të ishte e dobishme për elektoratin shqiptar bërja publike e cdo dokumenti të Sigurimit të Shtetit për Kryeministrin aktual. Pa dyshim këtu do përfshirë tërë dokumentacioni i shkuarjes së Ramës në Gjermani për ndeshje basketbolli me ekipin e Dinamos. Është interesant edhe një informacion i shkurtër dhe mjaft i paqartë i Sigurimit për një incident të profesorit të ri të ILA-së Edi Rama me “mbesën e Udhëheqësit kryesor” rrëzë pusit të Manastirit të Ardenicës. Për të kuptuar frymën e rebelimit të shqiptarëve dhe të shpërbërjes së regjimit komunist në vjeshtën e vitit 1990 ia vlen të bëhen publike edhe spiunëllëqet, që i bëheshin Edi Ramës nga zelltarët e regjimit në koma, për sjelljet dhe bisedat, që Rama bënte në mjediset e ILA-së.

Të tilla dokumente do t’u shërbejnë shqiptarëve edhe për të kuptuar përbërjen e pazakontë të Kabinetit Rama. Fjala vjen, nëse lexon shkresën e operativit të Sigurimit për ndarjen nëpër dhomat e hotelit të basketbollistëve të Dinamos, kupton pse është pjesë e kabinetit njëri nga ministrat. Fjetja në një dhomë me Ramën është faktor i rëndësishëm në përcaktimin e përbërjes së Kabinetit Rama. Fjala vjen mund të bëhesh anëtar kabineti mjafton të flesh në një dhomë me njerën nga ish gratë e Ramës. Mund të bëhesh ministër mjafton që të shndërrohesh familjarisht në “aktore” në një “remake” të novelës së Kutelit Vjeshta e Xhelladin Beut në Sarajet e Surrelit. Po ashtu mund të bësh lidhje midis shkresës, që trajton shkurtimisht historinë te Pusi i Ardenicës me një arrestim VIP për kokainë gjatë qeverisjes Rama. Për të kuptuar zhvillimet gjatë epokës Rama ka rëndësi të vecantë leximi aktiv i këtyre dokumentave të Sigurimit të Shtetit, të cilat në një formë ose në një tjetër kanë lidhje me Ed Ramën e atyre viteve.

Me sa duket zj. Gentjana për sa i përket hapjes së dosjeve ka përpara një detyrë shumë më të vështirë sesa ndërtimi i pallateve te Kodra e Diellit duke respektuar apo edhe duke i shkelur kondicionet urbane.