Gjirokastër, sekuestrohen 1772 kg drogë, 4 në pranga, 3 në kërkim

Policia e Gjirokastrës ka sekuestruar 1772 kg lëndë narkotike, ndërsa në pranga përfunduan 4 persona dhe 3 u shpallën në kërkim. Bëhet fjalë për Besim Zikën, 46 vjeç, Pëllumb Ronën, 55 vjeç, Festim Ronën, 65 vjeç si dhe Çoban Kalemi, 52 vjeç, të gjitha nga Memaliaj.

Burime zyrtare nga policia pohuan se në kërkim u shpall shtetasi G.G. Në bazë të informacioneve të marra në rrugë operative, nga kontrolli i ushtruar nga Shërbimet e Policisë në banesën e Pëllumb Ronës, u gjet një sasi prej 65 kg hashash, e paketuar në thasë plastik. Ndërkohë, Besim Zikës, iu gjet rreth 17 kg marijuian dhe Çoban Kalemit iu gjetën në banesën 19 thasë me drogë, me peshë totale 160 kg, si dhe një armë zjarri automatik, model 56 me 14 fishekë. Sakaq, në banesën e shtetasit G.G, në fshatin Maricaj, u gjetën 27 thasë me peshë totale 270 kg, ku vijon puna për kapjen e këtij shtetasi.

Gjithashtu në vendin e quajtur “Kodra e Miricës”, në fshatin Miricë, Memaliaj u gjetën 42 thasë me lëndë të dyshuar narkotike Cannabis Sativa, me peshë totale 1260 kg. Vijon puna për kapjen e dy autorëve tashmë të identifikuar nga ana jonë, ku për arsye hetimi nuk bëjmë me dije gjeneralitetet e tyre.