Grabitja e banesës, flet deputeti: Më njoftuan fqinjët, shtëpinë e kishin kthyer përmbys

TIRANË- Deputeti socialist Namik Kopliku ka dhënë një prononcim për BalkanWeb menjëherë pas publikimit të lajmit për grabitjen e banesës së tij në Tiranë.

Kopliku ka treguar për gazetaren Marsela Karapanço se kur ka ndodhur ngjarja ka qenë në Shkodër për aktivitetet e organizuara me rastin e festave të 28-29 nëntorit. Ai tha se është njoftuar dje nga fqinjët për diçka të dyshimtë në derën e shtëpisë dhe menjëherë është nisur për në Tiranë.

“Gjatë momentit të grabitjes, banesa ka qenë e mbyllur sepse unë me gjithë bashkëshorten ishim në Shkodër për aktivitetet e organizuara me rastin e 28-29 nëntorit. U shqetësuam normalisht edhe unë edhe gruaja. Kur shkuam në banesë gjetëm fishekun e bravës së derës të prishur dhe derën e hapur. Kishin marrë sende me vlerë, bizhuteri. Në ambient kishin bërë rrëmujë, e kishin kthyer përmbys në kërkim të gjërave me vlerë dhe parave ndoshta”, ka treguar deputeti socialist.

Ai deklaroi se menjëherë ka bërë kallëzimin në polici për ngjarjen duke dhënë edhe të dhënat për gjërat që mungonin në banesë.

“Denoncova në polici dhe jam në pritje të vënies së autorëve para drejtësisë. Përveç bizhuterive e sendeve me vlerë kanë vjedhur edhe një sasi parash, lekë të përdorimit të përditshëm. Grabitja mund të ketë ndodhur edhe 2 ditë më parë por fqinjët e kanë njoftuar dje sapo kanë vë re diçka të dyshimtë”, tha deputeti Kopliku.

Policia ka nisur hetimin për ngjarjen dhe identifikimin e autorëve menjëherë pas marrjes së dëshmisë së deputetit.