Hamdi Salihi vuan për golin, Agostineli me “terapi” speciale

Pasi janë kthyer te fitorja pas katër javësh mungesë, tashmë në kampin bardhekuq kërkohet që rezultatet e mira të kenë vijimësi, qofshin këto edhe në transfertë. Sigurisht që ndeshja kundër Laçit është te porta dhe Skënderbeu i trajnerit Agostineli kërkon patjetër fitoren e radhës. Por, kësaj here kërkohet që trepikëshi të shoqërohet edhe me lojë të bukur, sikundër ka qenë kërkesë jo vetëm e klubit, por edhe e tifozëve.

Natyrisht që loja jo fort e mirë që ka zhvilluar Skënderbeu në këto javë të fundit ka qenë pre e kritikave të shumta që kanë ardhur fillimisht nga tifozët, opinioni publik e më pas kanë pasqyruar pakënaqësitë e tyre edhe drejtuesit e klubit bashkë me presidentin Takaj. Sigurisht që fitorja ndaj Korabit nuk tregoi diçka më të mirë, për sa i përket raportit të lojës, por Skënderbeu iu gëzua vetëm rikthimit te pikët e plota dhe mbajtja e vendit të parë në renditje.

I ndodhur në një pozicion të tillë dhe duke parë kritikat e shumta në drejtim të lojës, trajneri Agostineli para seancës së djeshme stërvitore e ka parë të arsyeshme të mbledhë ekipin për rreth 20 minuta në dhomat e zhveshjes për të bërë një analizë të fundit rreth takimit të së shtunës kundër Laçit. Italiani u ka “shkulur veshin” lojtarëve dhe u ka kërkuar atyre se këtë herë rezultati duhet të vijë edhe me lojë të bukur.

Analiza e Agostinelit

Numri një i stolit bardhekuq e nisi analizën e ekipit duke ulur në maksimum ndjenjën e presionit te lojtarët dhe duke u bërë me dije të mendojnë vetëm për takimin e radhës.

“Të shtunën do të luajmë kundër Laçit dhe duhet të jemi gati për këtë takim. Le të mendojmë vetëm për këtë sfidë dhe për asgjë tjetër. Të mendojmë dhe të hyjmë në fushë për të fituar dhe, më pas, të shohim edhe lojën e mirë, që do ta bënte takimin edhe më të bukur.

Loja është një kusht që i duhet një ekipi si ju, një ekipi kampion për të treguar se kjo periudhë e keqe që kaluam ka marrë fund njëherë e mirë. Të jemi të qetë dhe të përqendruar. Unë jam i bindur se, nëse e bëjmë këtë, atëherë do ta kemi më të thjeshtë për t’u shprehur në fushën e lojës”. Këto ishin fjalët e para që Agostineli iu drejtoi të tijve në analizë.

Terapia për sulmin

Hamdi Salihi dhe sulmuesit e tjerë duken në krizë goli, por trajneri mendon se e ka gjetur terapinë për ta kaluar këtë ngërç.

“Në ndeshjen e fundit kundër Korabit u kemi ofruar shumë mundësi kundërshtarëve të na sulmojnë. Është një gjë që nuk duhet të ndodhë kaq herë, pasi rrezikojmë të pësojmë. Duhet të jemi më të bindur në ndërhyrjet tona dhe më të saktë në mbulim qoftë të zonës, qoftë të kundërshtarit, jo t’i humbasim balancat. Më pas, si të kemi bërë mirë këtë do të shohim të riorganizohemi përpara.

Pasime sa më të sakta dhe të shpejta, por vertikalizimet janë më të duhurat që dua të shikoj më shpesh nga ju. Unë e kam thënë se duhet të shikoj një ekip që sulmon me 7 lojtarë në zonën kundërshtare dhe këtë nuk duhet ta bëni vetëm me fragmente loje, por gjatë gjithë kohës. Kritika kam për furnizimin e sulmuesve ashtu si duhet.

Veçanërisht nga lojtarët e krahut, apo ata që kanë qenë në krah në momente të caktuara. Të harrojmë gëzimin personal, por të mundohemi për të mirën e ekipit”, përfundoi skanerin e tij trajneri i Skënderbeut me lojtarët gjatë ditës së djeshme.