Hapja e dosjeve, PD bojkot votimit të emrave në Kuvend

Partia Demokratike do të bojkotojë votimin për përzgjedhjen e anëtarëve të Autoritetit të Hapjes së Dosjeve sot në Parlament. Udhëzimi deputetëve të opozitës u është komunikuar nga kreu i PD-së, Lulzim Basha, në mbledhjen e Grupit Parlamentar të zhvilluar këtë të mërkurë, raporton “Panorama”.

Për rreth 60 minuta deputetët e PD-së kanë diskutuar lidhur me vendimin e njëanshëm të shumicës për t’i hequr opozitës anëtarin e saj në këtë autoritet. Burime nga Grupi Parlamentar sqarojnë se në fjalën e tij kreu i PD-së, Lulzim Basha, ka theksuar se kjo vendimmarrje lidhet me qëllimin e hershëm të maxhorancës për të kontrolluar e vetme procesin e vetingut për gjyqtarët dhe prokurorët.

Në ligjin e vetingut, miratuar në Kuvend vetëm me votat e shumicës, u miratua edhe kërkesa e opozitës që të gjithë prokurorët dhe gjykatësit e rinj që do të jenë pjesë e sistemit të drejtësisë të mund të verifikohen edhe për lidhjet me të shkuarën komuniste. Si rrjedhojë, Autoriteti për Hapjen e Dosjeve do të ketë tagrin të kalojë në sitë të gjithë gjyqtarët dhe prokurorët që kanë shërbyer gjatë periudhës së komunizmit.

NEGOCIATAT

Basha u ka sqaruar deputetëve të opozitës negociatat e zhvilluara nga nënkryetari i PD-së, Edmond Spaho, me përfaqësuesin e maxhorancës, Taulant Balla. Sipas tij, përmes një dakordësimi palët kanë dalë me një vendim që në autoritet nga dy propozimet e Kuvendit një të propozohej nga maxhoranca dhe një nga opozita.

Por pavarësisht kësaj, duket se marrëdhëniet e tensionuara brenda shumicës kanë bërë që PS e LSI të mos dalin me kandidat të përbashkët. Në këtë mënyrë, ai që do të sakrifikohet do të jetë kandidati i propozuar nga opozita.

Sipas demokratëve, ky vendim më shumë sesa për përfaqësim në autoritetin që do të hapë dosjet e sigurimit nga shumica po përdoret për të garantuar personat e saj në institucionin përgjegjës për procesin e vetingut.

KANDIDATËT

Lëvizja Socialiste për Integrim propozoi si anëtar të saj kandidatin Altin Hoxha, ndërsa Partia Socialiste kandidatin Mariglen Kasmi. Ndërkohë që Partia Demokratike ka propozuar si kandidat Selami Zallin.

Po ashtu në votim sot në seancë plenare do të jetë dhe kandidatura e Daut Gumenit, i propozuar nga Shoqata e ishtë Përndjekurve Politikë, por që ka marrë firmat e 28 deputetëve socialistë, ndërkohë dhe Simon Miraka, kandidat i propozuar nga Shoqata e Mbrojtjes së të Drejtave të Njeriut, i mbështetur nga 28 firma deputetësh demokratë.

Në votim do të jetë dhe Gentiana Sulaj, kandidate e propozuar nga Këshilli i Ministrave, njëherësh do të jetë dhe kryetare e Autoritetit të Hapjes së Dosjeve.