Hapja e negociatave për anëtarësimin në BE, Austria: Kusht janë zgjedhjet e 2017-ës

Dr. Michael Linhart, Sekretari i Përgjithshëm i Punëve të Jashtme të Austrisë, ka deklaruar sot nga Tirana se Austria është në favor të hapjes së negociatave të Shqipërisë me BE-në, por tashmë ecuria varet nga Shqipëria , e cila duhet të përshpejtojë zbatimin e Reformës në Drejtësi me ligjet përkatëse dhe sidomos, të përmbushë standartet e duhura për zgjedhjet e vitit 2017.

“Rekomandimet janë të qarta, – tha Linhart. – Ndryshime në opinione ka dhe do të ketë, por gjithçka mbetet në duart e Shqipërisë; në fakt ky vit na çon dhe drejt zgjedhjeve dhe nëse zgjedhjet do të përmbushin standartet e duhura.”

Linhart i bëri deklaratat gjatë një konference shtypi të përbashkët me Ministren e Integrimit Klajda Gjosha.

Linhart tha ndër të të tjera: Shqipëria është një partner shumë i mirë dhe i rëndësishëm për ne. Evropa ka nevojë dhe për Shqipërinë, edhe pse ky rekomandim qe në kushte të caktuara siç ka të bëjë me zbatimin e reformës në drejtësi dhe ligjet përkatëse. Austria është një partner i fortë për Shqipërinë dhe të gjitha vendet e Ballkanit Perëndimor.

Megjithatë është e rëndësishme dhe varet nga Shqipëria që të përshpejtohet me zbatimin e reformës në drejtësi. Dua të them edhe njëherë që jemi shumë të lumtur t’ju asistojmë në hapat e mëtejshëm që do të ndërmerrni.”

PYETJE NGA GAZETARET

Pyetje: Z. Linhart ju e vlerësuat Shqipërinë një partner, por çfarë qëndrimi do të mbajë Austria në dhjetor? Znj. Gjosha, a ka ndonjë vend që është shprehur kundër hapjes së negociatave?

Linhart: Siç e përmenda, ne jemi në favor të hapjes së negociatave. Megjithatë do të priten konkluzionet e Këshillit dhe ne do të përpiqemi të bindim partnerët tanë të mbajnë një qëndrim pozitiv për këtë.

Gjosha: Për vendet skeptike unë do të rikujtoja se ky është një proces. Shqipëria e ka marrë një rekomandim pozitiv me një kusht që ne ia kemi vendosur vetë vetes, vazhdimësinë e zbatimit të reformës në drejtësi me rezultate të prekshme dhe zbatimin e ligjit të Vettingut.

Z. Linhart! Unë po unë do përmendja dy vende skeptike për negociatat, Hollandën dhe Greqinë, A do të ndërhyni ju në këtë proces?

Linhart: Nëse një vend ka bërë progress, ne e vlerësojmë atë dhe Shqipëria ka bërë; ne e vlerësojmë atë ecuri dhe ndaj i ndihmojmë këto vende, por duhet të na ndihmojnë edhe ato.

Z. Linhart! Ku konsistojnë rezervat më të mëdha ndaj Shqipërisë deri tani?

Në fakt, rekomandimet janë të qartë, ndryshiime në opinione ka dhe do të ketë. Por gjithçka mbetet në duart e Shqipërisë. Në fakt ky vit na çon dhe drejt zgjedhjeve dhe nëse zgjedhjet do të përmbushin standartet e duhura, atëherë dhe ne do të jemi pozitivë.”