Incident në Bruksel, delegacioni i Serbisë s’e ‘honeps’ delegacionin e Kosovës

Një delegacion i Komisionit për të Drejtat e Njeriut dhe Personave me Aftësi të Kufizuara i Kuvendit të Kosovës, i kryesuar nga kryetarja e këtij komisioni deputetja Lirije Kajtazi, po qëndron në Bruksel në konferencën e organizuar nga Parlamenti i Evropës me temën “Konferenca për Ballkanin Perëndimor për Persona me Aftësi të Kufizuara”.

Deputetja Kajtazi prezantoi temën “Qasja e lirë e Personave me Aftësi të Kufizuar në shërbimet e transportit dhe përkushtimi i institucioneve të Republikës së Kosovës”.

Gjatë prezantimit ndodhi një incident, i shkaktuar nga delegacionit serb, i cili kërkonte nga organizatori që Kosova mos të jetë pjesë e kësaj konference.

Por, organizatori i konferencës i ka ofruar delegacionit kosovar mundësi prezantimit të nivelit shtetëror, përkundër reagimit serb.

Kryesuesja e delegacionit të Kosovës, deputetja Lirije Kajtazi, në reagimin e saj ndaj këtij incidenti, e ka cilësuar këtë sjellje të delegacionit serb si produkt të “mentalitetit primitiv” serb.

“Ky është një një mentalitet primitiv, i cili fyen vlerat e BE-së. Tani Kosova Republikë është pjesë e një realiteti që e kanë njohur 112 vende pjesa më e madhe e tyre me demokraci të zhvilluar. Dhe njohja e Kosovës nga ana e Serbisë është për të mirën evropiane të saj dhe Kosovës”, ka thënë Kajtazi, citon gazeta “Zëri”