Ish-deputeti suedez: Pse diaspora nuk investon në Shqipëri

Avni Dervishi, përfaqësues i diasporës sonë në Suedi, shprehet se është korrupsioni i zyrtarëve dhe politikanëve që frenojnë investimet e diasporës në Shqipëri.

Ish-anëtar i Parlamentit suedez me Partinë Liberale, Dervishi, i cili ka marrë pjesë në proceset integruese të vendeve të Europës Lindore, tregon për “Panoramën” se ka shumë ekspertë të ekselencës që mund t’i shërbejnë Shqipërisë.

Ai është politolog në profesion, ka Master në Shkencat Politike Europiane. Dervishi ka qenë i përfshirë gjatë studimeve të tij me dhjetë vende, të cilat aplikonin për anëtarësim në Bashkimin Europian, Polonia, Çekia, Hungaria etj.

Ju jeni marrë dhe me proceset e integrimit të Shqipërisë, ku keni kontribuar?

Jam munduar të jap ndihmesën time gjatë procesit të Marrëveshjes së Stabilizim-Asociimit. Siç dihet, përpara çdo marrëveshjeje të Stabilizim-Asociimit është dashur të miratohej nga parlamentet e vendeve anëtare dhe arsyeja ishte se në këto vende të Unionit Europian unë kam pasur lidhjet të mira me ta, dhe i kam përdorur për këtë qëllim. Unë kam qenë 6 vjet në Parlamentin suedez, isha në Partinë Liberale të Suedisë në atë kohë, por të them të drejtën kur ishte puna për Ballkanin, apo për shqiptarët, unë i fusja hundët kudo. Kisha të drejtë ose jo, kjo është një gjë tjetër. Suedezët kanë një shprehje të tyre: “Ti provoje, më shumë se jo nuk mund të thotë kush?!”

Samiti për diasporën, mendoni se duhej të ishte bërë më shpejt, është i vonuar?

Të them të drejtën, unë kam qenë i involvuar për shumë vite në lobime sa i përket diasporës. Këto tre muajt e fundit kam qenë në 8 shtete europiane, ku kam takuar diasporën shqiptare, isha në Londër, në Bruksel, në Vjenë, në Veriun e Italisë, në Treviso dhe Milano, por kam qenë dhe në disa vende, në Gjermani dhe në Nju Jork. Diaspora shqiptare në disa vende ka dhe ekspertë, të cilët mund t’i nevojiten Shqipërisë shumë, jo vetëm në proceset europiane, në investimet ekonomike, përmirësimin e standardit ekonomik, me qëllim që njerëzit të mos largohen nga Shqipëria. Unë kam bashkëpunuar dhe me diasporën hebreje, të cilët janë një shembull shumë i mirë, sepse ndihmojnë shumë njëri-tjetrin, ndryshe nga ne shqiptarët. U gëzova shumë nga ftesa për këtë samit. Duhej të ishte bërë më shpejt. Dua të theksoj një gjë: diaspora shqiptare jashtë nuk ndahet se nga vjen, nga Maqedonia, Kosova, Mali i Zi, apo Shqipëria, të gjithë ndihen shqiptarë, një komb. Ne lobistët e diasporës veprojnë në mënyrë të pavarur dhe nuk ndikohemi nga politikat e Shqipërisë apo Kosovës, ne punojmë për çështjen kombëtare.

Përse ka pak investime nga përfaqësues të diasporës në Shqipëri?

Shqiptarët e diasporës dërgojnë remitanca në familjet e tyre, por jo dhe aq sa duhet. Por diaspora nuk investon në Shqipëri nga frika e korrupsionit, ka frikë se paratë që do të investonte në Shqipëri, do të shkonin në xhepat e zyrtarëve dhe politikanëve. Kjo është arsyeja e vetme. Por, nga ana tjetër, ka një mungesë organizimi nga shteti në lidhje me diasporën. Çdo bashki duhet të ketë një zyrë të saj, që të merret me anëtarët e diasporës në atë bashki dhe të punojë për thithjen e investimeve nga diaspora. Ka disa vende që kanë ministri për diasporën. Një nga qëllimet e këtij samiti, besoj se do të jetë tërheqja e vëmendjes për të nxitur investimet e diasporës në Shqipëri. Një tjetër qëllim i samitit duhet të jetë bashkimi i ekselencës së diasporës për interesin kombëtar. Unë kam propozuar që në çdo ambasadë shqiptare ku ekziston diaspora shqiptare të ketë një atashe që të merret vetëm me thithjen e investimeve të diasporës. Në Nju Jork ka biznese shqiptare nga diaspora shumë të fuqishme. Mund të përmend një emër, Xhorxhio Kola, shqiptar nga Mali i Zi, që ka hapur një kompani multimilionere “Pizza Famigla”, i cili ka hapur një restorant në aeroportin e Tel Avivit, në Johanesburg dhe në shtete të tjera, përse të mos hapë dhe në Rinas? Duhet të ketë një vëmendje më të madhe edhe nga shteti për rritjen e besimit në Shqipëri.
PANORAMA