Ish gruaja e Ramës sulmon studenten që hodhi salcë në kokën e ministres

Delina Fico, aktiviste e Shoqërisë Civile, e ka emërtuar dhunë fizike gjestin e Lëvizjes për Universitetin, ku pak orë më parë, hodhën salcë mbi kokën e ministres së Arsimit Lindita Nikolla.

Nëpërmjet një shënimi në profilin e saj në facebook, Fico shkruan se është turp për një grua që dhunon fizikisht një grua ministre, pavarësisht e kujtdo qeverie qoftë.

“Kam simpati për çdo protestë paqësore. S’kam pasur dhe s’kam përkrahur asnjëherë një protestë të dhunshme për asnjë arsye. Nuk kam asnjë simpati për delirantë që mendojnë se i dinë të gjitha; që besojnë se bota duhet të jetë vetëm ashtu siç e mendojnë ata, se, përndryshe ata të dhunojnë!”, shkruan ajo.

Sipas saj, ka 1 mijë mënyra paqësore për të protestuar dhe s’ka absolutisht asnjë justifikim për të dhunuar fizikisht një njëri tjetër.

Ndër të tjera, Fico, thekson se absolutisht asgjë nuk përfitojnë studentët nga pseudo-protesta të tilla të dhunshme.

“Fiton vetëm deliri i këtyre pseudo-revolucionarëve për t’u bërë personazhe mes grupit të vogël që i rrethon e që vetë-ushqehen reciprokisht me delir”, shkruan Fico në Facebook.