Ish-mësuesja e Inxhinierisë: Si më hoqi nga puna ish-koordinatori i PS-së për zgjedhjet në Shkozet

Një ish-mësuese e shkollës së mesme profesionale “Beqir Çela” në Shkozet të Durrësit ka denoncuar dje publikisht drejtorin e këtij institucioni arsimor. Bëhet fjalë për Vjollca Grudën, e diplomuar në degën Inxhinieri në vitet 1984-1989, e cila dhjetë ditë më parë është hequr nga puna. 55-vjeçarja deklaroi se ajo është larguar padrejtësisht nga puna nga drejtori i ri i shkollës, Fatmir Mërkuri, i cili erdhi në atë detyrë si koordinator i PS-së për zgjedhjet në Shkozetin në vitin 2015. Në një intervistë për “Gazeta Shqiptare”, ajo tha se shkarkimi i saj ka prapavijë politike dhe se ka bërë padi në gjykatë, ku do të kërkojë drejtësi. Gruda tregoi me detaje përplasjet me drejtorin e shkollës, ndërsa bëri me dije se ai abuzon me detyrën.

Zonja Gruda kur jeni shkarkuar nga puna?
Para 10 ditësh më shkarkoi drejtori i ri, zoti Fatmir Mërkuri. Kam qenë përgjegjëse e bazës prodhuese të shkollës. E kam kryer shumë mirë këtë detyrë dhe për këtë kam letër performance nga të gjithë drejtuesit e shkollës në vite. Me ardhjen e drejtorit të ri, nisi beteja me të.

Si nisi kjo “betejë”?
Mbaja pozicionin e nëndrejtoreshës së shkollës. Pasi kishte takuar të gjithë stafin, mua më takoi të fundit fare. Ky ka qenë takimi i parë dhe i fundit me të në këtë shkollë. Drejtori Fatmir Mërkuri, më 30 qershor të këtij viti më njoftoi që të paraqitesha në drejtori për marrëdhëniet e punës.

Çfarë ju komunikuan në këtë takim?
Unë shkova në takim. Ai më tha që do hiqesha nga pozicioni i përgjegjëses dhe do punoja mësuese. Në vendim tim çoi një mësues tjetër, që nuk është inxhinier, ndërkohë që unë kisha eksperiencën e duhur për këtë vend pune.

Po më pas çfarë ndodhi me ju?
Nuk më çoi të jepja teori ku më takonte në bazë të lëndës sime mësimore, por më çoi tek auto-praktika. As në kohën e komunizmit nuk ka ndodhur që një mësuese të japë auto-praktikë, që një grua të hapë motorin, të ulet poshtë makinës. Unë e bëra edhe këtë punë, por nuk u mjaftua me kaq. Zoti Mërkuri më kishte dhënë një vërejtje për paralajmërim nga puna, ndërsa unë nuk isha në dijeni për këtë.

Për çfarë ishte paralajmërimi për heqje nga puna?
Në shkollën e mesme profesionale, nxënësit në fund të vitit shkollor paguajnë 500 lekë për siguracionin e tyre që të kryejnë praktikën në biznese të ndryshme. Tarifa mblidhet nga mësuesi dhe bëhet pagesa e siguracionit. Paratë ua mblodhëm nxënësve si çdo vit, ndërsa kjo u konsiderua shkelje nga ana ime. Jua kthyem paratë prapë, ndërkohë që në fillim të vitit të ri arsimor kur nxënësit duhet të nisnin praktikën 7-javore në biznese, tri javët e para nuk u bë praktika, për shkak të mungesës së siguracioneve për ta.

Me çfarë motivacioni ju shkarkoi drejtori para 10 ditëve?
I pari ishte pikërisht siguracioni i nxënësve. Në muajin që shkoi pata një debat me një koleg, ish-nxënës i imi, i cili është bërë mësues në këtë shkollë. E këshillova për një veprim shumë të pahijshëm që po bënte karshi një tjetër mësuesi, por ai më ofendoi rëndë. Ndërkohë, drejtori mblodhi komisionet e etikës dhe të disiplinës. Çdo gjë u bë në fshehtësi dhe ky ishte paralajmërimi i dytë për pushim nga puna dhe sërish nuk dija gjë. Pas dy paralajmërimeve, drejtori vendosi të më pushojë nga puna. Është absurd që pas 27 vitesh në profesion inxhiniere dhe 10 vite mësuese më heqin nga puna në këtë mënyrë. Gjithçka është e qartë, shkarkimi im ka prapavijë politike.

Pse e konsideroni politik largimin tuaj nga puna?
Kjo për faktin se unë kam hyrë në punë në kohën që në qeveri ka qenë e djathta, ndërkohë që sapo erdhi drejtori i ri, më tha që arsyet e largimit unë i di vetë se cilat janë. Sa erdhi ky drejtor, shkolla u mbush me militantë partie që nuk kanë lidhje as me arsimin e as me zanatin. Unë kam pasur përplasje me drejtorin për shpërdorimet që ka bërë në shkollë.

Për çfarë shkeljesh bëhet fjalë?
Në dijeninë time, ne kemi pasur një automjet tip “Wolsvagen”, prodhim i vitit 2010, krejtësisht i ri, dhuruar nga fondacioni zviceran “Swiss kontakt”. Puna e parë që bëri drejtori ishte pajisja me targa të mjetit, të cilin e ka vënë në dispozicion të familjes së tij. Mjeti ka dalë nga inventari i shkollës është në shërbim të familjes, e përdor bashkëshortja e tij.

Në dijeninë tuaj, a ka nxënës që qëndrojnë jashtë shtetit dhe marrin shkollën e provimet tek shkolla “Beqir Çela”?
Po kështu që kur ka ardhur ky drejtor në shkollë, punohet me dy standarde. Një nxënës është jashtë shtetit, por në vend të tij u paraqit në shkollë një tjetër person për të marrë provimet e vjeshtës. Ne si mësues e kemi parë dhe i jemi kundërpërgjigjur, por drejtori nuk ka marrë asnjë masë.

Çfarë kërkoni ju?
Unë kërkoj të rikthehem në punë. Gjykoj që jam larguar komplet padrejtësisht e për këtë do të kërkoj drejtësi nga gjykata, së cilës i jam drejtuar. Do përballem në gjykatë me drejtorin, sepse gjykoj që duhet të vihet drejtësi.