Ja çfarë gjendet në nëntokën e Ministrisë së Brendshme

Bunkeri muze, i cili është pagëzuar me emrin “Bunkart 2”, është ngritur në ambientet e ish-strehimit antiatomik të Ministrisë së Brendshme, ndërtuar në vitin 1982-1986, i cili në atë kohë njihej me emrin e koduar “Objekti Shtylla”.

Protestat e opozitës më 8 dhjetor të vitit 2015 kanë lënë shenjat e tyre në këtë bunker, të cilat kuratorët kanë zgjedhur t’i lënë ashtu siç ishin pa i ndryshuar.

Objekti ka imazhin e një kupole me drita të cilat reflektohen në portretet e mbi 100 martirëve që u ekzekutuan me gjyq e pa gjyq gjatë viteve të regjimit komunist.

Në dhomat e para të muzeut janë të ekspozuara foto, video dhe dokumente të kohës, nga krijimi dhe funksionimi i xhandarmërisë dhe policisë në vitet para Luftës së Parë Botërore, dhe pas saj deri në shpalljen e mbretërisë.

Ndërkohë, në vazhdim gjenden të ekspozuara imazhe të historisë së Policisë Popullore në vitet ‘44-‘91. Një nga dhomat e këtij muzeu u është kushtuar martirëve që dhanë jetën si kundërshtarë të regjimit komunist.

Objekte të tjera si aparate përgjimi, radio apo edhe deri në dhoma që do të përdoreshin për rregullime estetike, janë ajo çka është ofruar në bunkerin muze në oborrin e Ministrisë së Brendshme./panorama