Krimi në kapanonin e hashashit/ Prokuroria ende nuk di nëse Besnik Pudja është vrarë apo vetëvrarë

Ekspertiza e Mjekësisë Ligjore, nuk përcakton nëse Besnik Pudja është vrarë apo vetëvrarë në kapanonin e hashashit në Kollgjesh të Shëngjergjit.

Prokuroria e Tiranës, tashmë ka administruar në dosjen e saj ekspertizën e Mjekësisë Ligjore, e cila ka renditur në disa faqe konkluzionet e ekzaminimit të trupit të besnik Pudjes, i gjetur i vdekur në nja kapanon të sajuar për tharjen e hashashit më 7 Tetor, raporton ABC News.

Ekspertët nuk përcaktojnë dot nëse Pudja është vrarë apo vetëvrarë, pasi plaga e hyrjes së plumbit në kokë është më e vogël se ajo e daljes. Nisur nga kjo, dyshohet se qitja është bërë me vendosjen në kokë të grykës së armës.

Nga ana tjetër, ekspertët kriminalistikë të policisë janë të bindur se Besnik Pudja është vetëvrarë, kjo për faktin se në duart e tij janë gjetur mbetje baruti që dyshohet se i kanë mbetur pas shkrepjes së armës.

Prokuroria, duke parë dy versioneve të ndryshme të ekspertëve, ka vendosur të presë përgjigjen edhe të analizave të tjera, të cilat po kryhen për këtë ngjarje. Deri në përfundimin e ekzaminimeve të tjera, për prokurorinë ende nuk dihet nëse Besnik Pudja është vrarë apo vetevrarë.